भांगरभूंय | प्रतिनिधी
मांगोरहील, वरुणापुरींत मुरगांव पालिकेची कारवाय
भांगरभूंय । प्रतिनिधी
मुरगांवः वास्को विवीध वाठारांत अतिक्रमणां आड मुरगांव पालिकेन खर मोहीम हातांत घेतल्या. मांगोरहील, वरुणापुरी राष्ट्रीय म्हामार्गा लागसार बेकायदो फळ विक्रेत्यांची दुकानां मातये भरवण केलीं.
मुरगांवचे नगराध्यक्ष लियो रॉड्रिगीज हांणी अतिक्रमणां आड खर मोहीम सुरू केल्या, मात वास्को वरुणापुरी राष्ट्रीय म्हामार्गाचेर नौदळान सोबितीकरणाच्या नांवा खाला केल्ल्या अतिक्रमणांचेर पालिका आनी राष्ट्रीय म्हामार्ग प्राधिकरण केन्ना कारवाय करतली, असो प्रस्न वरुणापुरीच्या फळ विक्रेत्यांनी केला.
मुरगांव नगरपालिकेन वास्को भाजी मार्केटांतल्या विक्रेत्यांनी केल्ल्या अतिक्रमणा आड कारवाय अजून चालूच दवरल्या. शुक्रारा 2 डिसेंबराक पालिकेन वास्को मांगोरहील बीएसएनएल टॉवरा लागसारच्या आनी वरुणापुरी राष्ट्रीय म्हामार्गाचे कुशीक केल्ल्या अतिक्रमणांचेर खर कारवाय करून थंयचीं बेकायदो फळ दुकानां मातये भरवण केलीं.
हे कारवाये वेळार नगराध्यक्ष रॉड्रिगीज, पालिका भाजी मार्केट वेवस्थापन समितीचे मुखेली विनोद किनळेंकार, नगरसेवक प्रजय मयेंकार, नारायण बोरकार, पालिका निरिक्षक सेबेस्तांव परेरा, विभय प्रभुदेसाय, प्रकाश कादरी, पालिका कामगार आनी वास्को पुलीस हाजीर आशिल्ले.
वास्को वरुणापुरी राष्ट्रीय म्हामार्गाच्या मुखेल वोल्ताचेर व्हड प्रमाणांत फळ विक्रेत्यांनी दुकानां मांडिल्लीं. ह्या दुकानां खातीर हे आदींच राष्ट्रीय म्हामार्ग प्राधिकरणान पालिकेक नोटीस जारी करून कारवाय करपाचे आदेश दिल्ले. वास्को वरुणापुरी राष्ट्रीय म्हामार्गाचे कुशीक उबारिल्ल्या फळ विक्रेच्यांच्या दुकानांचेर पालिकेन कारवाय केली. तेच पद्दतीन पालिकेन नौदळान राष्ट्रीय म्हामार्गाचे कुशीक सोबितीकरणाच्या नांवा खाला केल्ल्या अतिक्रमणाचेर कारवाय करप गरजेचें आसा, अशें थंयच्या एका दुकानकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
