वास्कोंतल्यान कृष्णा साळकार दुसरे फावटी जैत मेळयत?

भांगरभूंय | प्रतिनिधी

पूण काँग्रेसीचे फुडारी नंदादीप रावत हांचे आव्हान

वास्को: वास्को मतदारसंघाची निर्मिती 1989 वर्सा जाले उपरांत ह्या मतदारसंघांतल्यान भाजपाचे कार्लोस आल्मेदा सोडून हेर कोणूच सेगीत दुसरे फावटी जैतिवंत जाले नात. सायमन डिसौझा हे सेगीत दोन फावटी जैतिवंत जाल्ले, पूण ते वेगळ्या वेगळ्या मतदारसंघांतल्यान जैतिवंत जाल्ले. वास्को मतदारसंघांची 1989 वर्सा निर्मिती जाले उपरांत सायमन डिसौझा हे वास्को मतदारसंघांतल्यान जाल्यार 1984 वर्सा दाबोळी मतदारसंघांतल्यान जैतिवंत जाल्ले. ताका लागून सद्याचे आमदार कृष्णा साळकार हे 2027चे वेंचणुकेंत जैत मेळोवन सेगीत दुसरे फावटी जैतिवंत जावन कार्लोस आल्मेदा हांची बरोबरी करतले काय कितें हें पळोवचें पडटलें.

हे घडयेक आमदार कृष्णा साळकार हांचे मुखार काँग्रेसीचे फुडारी आनी आदले नगराध्यक्ष नंदादीप रावत सोडून हेर कोणाचेंय आव्हान ना. ह्या मतदारसंघांतल्यान जुझे फिलीप डिसौझा हे दोन फावटी जैतिवंत जाल्ले. 1999 वर्सा डिसौझा हे युगोडेपाच्या तिकेटीचेर जाल्यार 2007 वर्सा राष्ट्रवादी काँग्रेस पक्षाचे तिकेटीचेर जैतिवंत जाल्ले. दोनूय फावटी तांची लडत भाजपाचे तेन्नाचे उमेदवार राजेंद्र आर्लेकार हांचे कडेन जाल्ली. 2022 वर्सा जुझे फिलीप डिसौझा हांणी वास्को मतदारसंघा बदला दाबोळी मतदारसंघांतल्यान वेंचणूक लडयिल्ली. पूण तांकां व्हडलेशें येस मेळ्ळें ना. ताका लागून 2027ची वेंचणूक ते वास्को मतदारसंघांतल्यान लडयतले अशी चर्चा आसा.

काँग्रेस पक्षान हेर राजकी पक्षां कडेन युती केल्यार जुझे फिलीप डिसौझा हे वास्को मतदारसंघाचेर आपलो दावो सांगतले अशें उलयतात. वास्को मतदारसंघांत काँग्रेसीची एकगठ्ठो मतां आसात. काँग्रेसीन आमदार साळकार हांचे बरोबरीचे उमेदवार दीत जाल्यार तशेंच काँग्रेसीची युती जायत जाल्यार वास्को मतदारसंघांत अटीतटीची लडत पळोवंक मेळटली.

कृष्णा साळकार हे सेगीत आपल्या मतदारां कडेन संपर्क सादून आसात. दरेक प्रभागांनी तांणी विकासकामां हातांत घेतल्यांत. आपलीं कामां अदृश्य न्हय जाल्यार प्रत्यक्षांत लोकांक दिसून येतात असो दावो ते सदांच करतात. फाटल्या 30-40 वर्सांत जो विकास जावंक ना तो विकास आपणे केल्ल्याचो दावो साळकार करतात. ह्या दाव्याक तांच्या समर्थकांचो व्हड तेंको मेळत आसा. जाल्यार नंदादीप रावत हांणी आपल्या नगराध्यक्ष काळांत नुस्त्या मार्केट आनी मुरगांव पालिका प्रशासकी इमारतीचें नुतीनकरणा खातीर लागपी निधी जीसुडाच्या खात्यांत वळयिल्लो. त्या वेळार तांकां तेन्नाचे आमदार आल्मेदा हांचो सांगात आशिल्लो. फाटले वेंचणुकेंत रावत हांणी काँग्रेसी वतीन उमेदवारी मेळोवपाचो यत्न केल्लो. पूण ऐनवेळार ती उमेदवारी आल्मेदा हांकां दिले उपरांत रावत परतून भाजपाचे वटेन गेल्ले. उपरांत घडिल्ल्या कांय घडामोडी उपरांत ते परतून काँग्रेसीत आयले. हे फावटी आपणाक काँग्रेसीची उमेदवारी मेळटली अशें ते सांगतात. तांणी मतदारां कडेन संवाद, संपर्क सादपाक सुरवात केल्या. एखादे समस्येचेर ते आवाज उडयतात. आमदार साळकार, भाजप सरकार हांकां ते लक्ष्य करीत आसात.

ह्या मतदारसंघांतल्यान 1989 वर्सा काँग्रेसीचे सायमन डिसौझा हे मगोचे डॉ. विल्फ्रेड मिस्किता हांकां 325 मतांनी हारोवन जैतिवंत जाल्ले. हे वेंचणुकेंत जुझे फिलीप डिसौझा हांणी अपक्ष म्हूण वेंचणूक लडयिल्ली. पूण 1994चे वेंचणुकेंत डॉ. विल्फ्रेड मिस्किता हांणी सायमन डिसौझा हांकां देड हजारां परस चड मतांनी हारयिल्लो. हे वेंचणुकेंत जुझे फिलीप डिसौझा हांणी साडेचार हजार परस चड मतां मेळयिल्लीं.

1999चे वेंचणुकेंत युगोडेपाचे जुझे फिलीप डिसौझा हे सुमार देड हजार मतांनी भाजपाचे राजेंद्र आर्लेकार हांचेर मात करून जैतिवंत जाल्ले. हे वेंचणुकेंत मगो बदला काँग्रेसी वतीन वेंचणूक लडोवपी डॉ. विल्फ्रेड मिस्किाता, डॉ. श्रीकांत वेरेंकार, अपक्ष उमेदवार आनी आदले आमदार सायमन डिसौझा उबे आशिल्ले.

2002चे वेंचणुकेंत भाजपाचे उमेदवार राजेंद्र आर्लेकार हांणी राष्ट्रवादी काँग्रेसीचे आनी आदले आमदार जुझे फिलीप डिसौझा हांकां हारयिल्लो. हे वेंचणुकेंत काँग्रेसीचे करोल ताहीर दाऊद, मगोचे डॉ. श्रीकांत वेरेंकार, अपक्ष उमेदवार तारा केरकार, सीपीएमचे थालमन परेरा रिंगणांत आशिल्ले.

2007चे वेंचणुकेंत जुझे फिलीप डिसौझा हांणी भाजपाचे राजेंद्र आर्लेकार हांकां हारयिल्लो. हे वेंचणुकेंत जेडी (एस) वतीन कार्लोस आल्मेदा, युगोडेपा वतीन आर्नाल्डो रेगो, मगो वतीन सेर्व्हुलो बार्रोस, सेव्ह गोवा फ्रंटा वतीन मिल्टन बार्रेटो उबे आशिल्ले.

2012चे वेंचणुकेंत भाजपाचे कार्लोस आल्मेदा हांणी आदले मंत्री आनी राष्ट्रवादीचे उमेदवार जुझे फिलीप डिसौझा हांचेर सुमार साडेचार हजार मतांनी जैत मेळयिल्लें. हे फावटी आदले आमदार कार्ल वाझ हांणी मुरगांव बदला वास्को मतदारसंघांतल्यान वेंचणूक लडयिल्ली. पूण तांकां फक्त 1394 मतांचेर समाधान मानचें पडिल्लें.

2017चे वेंचणुकेंत अपक्ष कृष्णा साळकार हांणी भाजपाचे कार्लोस आल्मेदा हांचे मुखार आव्हान उबें केल्लें. पूण तें आव्हान मोडून आल्मेदा सेगीत दुसरे फावटी आमदार म्हूण वेंचून आयले.

2022त कार्लोस आल्मेदा हांकां भाजपान तिकेट न्हयकारून कृष्णा साळकार हांकां उमेदवारी दिली. ताका लागून आल्मेदा हांणी काँग्रेसी वतीन वेंचणूक लडयली. पूण कृष्णा साळकार हे जैतिवंत जाले.

मजगतीं, आल्मेदा हांणी हालींच काँग्रेसीक सोडचीट दिवन आपल्या समर्थक नगरसेवकां सयत भाजपांत प्रवेश केलो ताका लागून भाजपाची शक्त वाडल्या. ताका लागून साळकार हे बिनधास्त आसात. साळकार हांचे मुखार कोणाचेंय आव्हान नाशिल्ल्याचें तांचे समर्थक सांगत आसात. साळकार हांणी विकासकामां करून वास्कोचो कायापालट केला. ताका लागून वास्कोतले मतदार हे साळकार हांचे फाटल्यान उबे रावतले हातूंत दुबाव नाशिल्ल्याचें तांचें समर्थक सांगतात.

एक मात खरें साळकार आनी तांच्या समर्थकांनी वास्को कदंब बस स्टॅण्डा वेल्यान आवाज उठयिल्लो. आपूण आमदार जाले उपरांत कदंब बस स्टॅण्ड पुर्णत्वाक व्हरपाचें आस्वासन साळकार हांणी दिल्लें. पूण कदंब बस स्टॅण्डाच्या रस्त्याचें डांबरीकरण सोडून बस स्टॅण्ड आसा तसोच आसा. हाचें उरफाटें आतां थंय पीपीपी धर्तीचेर थंब बस स्टॅण्ड बांदतना पांच नखेत्री हॉटेल बांदपाचो प्रस्ताव आसा. ते खातीर नंदादीप रावत हांणी आवाज काडिल्लो. ह्या पीपीपी मॉडेला संबीदी वास्कोकारांक योग्य स्पश्टीकरण दिवपाची गरज रावत हांणी उक्तायिल्ली. रावन हांणी आपले संपर्क कार्यालय सुरू करून मतदारां कडेन संवाद, संपर्क सादपाक सुरवात केल्या. सद्या तरी काँग्रेसी वतीन रावत हांचे नांव घेतात. ह्या नांवांन आनीन कोणाची भर पडटा काय कितें हें मुखार रोखडेंच कळटलें.