भांगरभूंय | प्रतिनिधी
2 लाख रुपया पिडीत चल्याच्या नांवार कायम ठेव
सान पिरायेच्या भुरग्यांक मारपेट प्रकरण
पणजी: तीन सान पिरायेच्या भुरग्यांक 2013 वर्सा गाळी संवून मारपेट केल्ल्या प्रकरणांत मुंबय उच्च न्यायालयाच्या गोंय खंडपिठान पेडणेंचे आदले नगराध्यक्ष वासुदेव राजेंद्र देशप्रभू हांकां पांच लाख रुपयांच्या दंडाची ख्यास्त दिली. हातूंतले दोन लाख रुपया पिडीत भुरग्याक दिवपाचो आदेशूय जारी केला. हे विशींचो आदेश न्या. भारत देशपांडे हांणी दिलो.
एका पिडीत भुरग्याच्या बापायन पुलिशेंत कागाळ केले उपरांत म्हापशें पुलिसांनी 4 ऑक्टोबर 2013 दिसा गुन्यांव दाखल केल्लो. 3 ऑक्टोबर 2013 दिसा सांजवेळा 5.30 वरांचेर कागाळदाराचो चलो आनी ताचे दोन इश्ट म्हापशेंच्या साल्ढाणा इमारतीच्या तेर्रासाचेर बाशिल्ले. ते तिगूय थंय खाद्यपदार्थ खाताले. त्याच वेळार त्या इमारतींत रावपी वासुदेश देशप्रभू आयले आनी त्या भुरग्यांक थंय सावन वचपाक सांगलें. पूण तीं भुरगीं थंय सावन गेलीं नात. उपरांत देशप्रभू हांणी भुरग्यांक दांड्यान मारपेट करून धमकी दिली अशें कागाळींत नमूद केल्लें.
ह्या मारपेटींत कागाळदाराच्या चल्याक गंभीर जखम जाल्ल्यान ताचेर म्हापशेंच्या आझिलो हॉस्पिटलांत उपचार केल्ले. हे विशीं म्हापशें पुलिशेंत कागाळ दाखल केले उपरांत 4 ऑक्टोबर 2013 दिसा गुन्यांव दाखल केल्लो.
मजगतीं, आरोपी वासुदेव देशप्रभू हांणी न्यायालयांत धांव घेवन अटकपूर्व जामीन मेळयिल्लो. न्यायालायच्या आदेशा उपरांत देशप्रभू हांकां 2 मे 2014 दिसा अटक करून उपरांत सशर्त जामीन दिल्लो.
दोनूय पक्षांची तशेंच पुराव्यांची दखल घेवन बाल न्यायालयान वासुदेव देशप्रभू हांकां दोशी थारायलो. न्यायालयान देशप्रभू हांणी भुरग्यांक मारपेट केल्ल्या प्रकरणांत 5 हजार रुपया दंड, पुरावे नश्ट केल्ल्या प्रकरणांत 5 हजार रुपया दंड. हे दोनूय दंड भरले नात जाल्यार दरेकी एका म्हयन्याची साद्या कैदेची ख्यास्त. जाल्यार गोंय बाल कायद्या खाला तीन म्हयन्यांची साद्या कैदेची ख्यास्त, आनी 1 लाख रुपया दंड. दंड भरलो ना जाल्यार 4 म्हयन्यांची साद्या कैदेची ख्यास्त दिली.
हे ख्यास्तीक देशप्रभू हांणी मुंबय उच्च न्यायालयाच्या गोंय खंडपिठांत आव्हान दिलें तेन्ना, बाल न्यायालयाच्या आदेशाचेर म्होर मारून आव्हान याचिका भायरायली. तशेंच चार सप्तकांत बाल न्यायालयांत शरण येवपाचो आदेशूय न्यायालयान दिलो.
मजगतीं, दुयेंत आशिल्ल्यान तांणी वयल्या आदेशाचो पुनर्विचार करपाची मागणी केली. हाची दखल घेवन उच्च न्यायालयान देशप्रभू हांकां पांच लाख रुपया दंड दिलो. तशेंच भोगिल्ली ख्यास्त गृहीत धरली. वयल्या पांच लाखां मदले 2 लाख पिडीत चल्याच्या बँक खात्यांत कायम ठेवी दवरपाचो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
