भांगरभूंय | प्रतिनिधी
वाळपय : गोंयांत वाडटे गुन्यांवकारी फाटभुंयेचेर सध्या बिराडकारांची पडटाळणी मोहीम सुरू आसा. वाळपय वाठारांत लेगीत ती पांवड्या पांवड्यान हातांत घेतात. ते प्रमाण नानूस- वाळपय एका कावलां अड्ड्यांत बनावट आधारकार्डां सयत एका तरणाट्याक वाळपय पुलिसांनी उत्तर प्रदेशांतल्या मोहम्मद इर्शाद (19) हाका अटक केली. तो तीन सप्तकां आदीं गोंयांत आयिल्लो.
इर्शाद हो नाणूस वाठारांतल्या इस्तियाकहमद अकबर अली शाह हाच्या कावलां अड्ड्यांत काम करतालो. बिरेस्तारा सांजे वेळार ताका वाळपय न्यायालयांत उबो केलो तेन्ना ताका तीन दिसांची पुलीस कोठडी फर्मायली.
मंगळारा दनपारां पुलिसांनी धाड घातली तेन्ना इर्शादाच्या ताब्यांत दुबावीत बनावट आधारकार्ड सांपडलें. ते उपरांत तांची चवकशी केली तेन्ना तो पुलिसांक खरी म्हायती दिवपाक टाळाटाळ करतालो. ते खातीर ताका अटक केली. कलम 336(2), 337 आनी 339 खाला गुन्यांव नोंद करून पुलीस फुडलो तपास करता. मुळावे चवकशेंत इर्शाद उत्तर प्रदेशांतल्या सिद्धार्थनगर जिल्ह्यांत रावता. तो कावल विकपा खातीर गोंयांत आयिल्ल्याचें मुखार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
