भांगरभूंय | प्रतिनिधी
वाळपय, प्रतिनिधी: वाळपय जवाहर नवोदय विद्यालयाच्या पालकांनी सत्तरी म्हालांतल्या मामलेदारांक निवेदन सादर केल्या उपरांत ताची उपजिल्होधिकार्यांनी गंभीर दखल घेतल्या. पालक आनी विद्यालयाचे प्राचार्य हांची जोड बसका उपजिल्होधिकारी निलेश धायमोडकार हांणी सोमार २२ एप्रिलाक दनपरां २.३० वरांचेर आपल्या कार्यालयांत आपयल्या. ह्या वेळार महाराष्ट्रांतले वट्ट २५ भुरग्यांक प्रवेश चाचणी परीक्षेंत बसोवपा खातीर दिल्ले परवानगेचेर सविस्तर चर्चा जातली. ह्या वेळार विद्यालयाचे पालक हाजीर रावतले.
हे विशीं मेळिल्ले म्हायती प्रमाण, सत्तरी म्हालाचे उपजिल्होधिकारी निलेश धायमोडकार हांणी विद्यालयांत सध्या सुरू आशिल्ल्या वादाचेर खर दखल घेतल्या. बनावट कागदपत्रां तयार करून महाराष्ट्रांतल्या वट्ट २५ जणांक प्रवेश चांचणी परीक्षेंत प्रवेश दिल्ले खातीर पालक तिडकल्यात. ह्या भुरग्यां खातीर थळाव्या भुरग्यांचेर अन्याय जाला. ताका लागून त्या भुरग्यांची वळेरेंतल्यान नांवां काडचीं आनी थळाव्या भुरग्यांक संद दिवची अशी मागणी पालक करतात. हे खातीर मामलेदारांक निवेदन सादर केल्लें. निवेदनाच्यो प्रती विद्यालयाक धाडिल्ल्यो. हे विशीं अहवाल सादर करपाचे निर्देश मामलेदारांनी दिल्ले. मात जवाहर नवोदय विद्यालयाच्या प्राचार्यांनी हे विशीं आजूनय अहवाल सादर करूंक ना. ताका लागून पालकांनी आनी तिडक उक्तायल्या.
दोन दिसां आदीं विद्यालयाच्या पालकांनी प्राचार्यांची भेट घेवपाक विद्यालयाक भेट दिल्ली. मात तांकां प्रवेश दाराचेर आडायले. हे विशीं पालकांनी घेतिल्ले भुमिकेचेर विशेश दखल उपजिल्होधिकार्यान घेतल्या. हे बसके विशीं विद्यालयाच्या प्राचार्यांकूय कळयलां अशें कळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
