भांगरभूंय | प्रतिनिधी
भांगरभूंय । प्रतिनिधी
वाळपय : वाळपय जवाहर नवोदया विद्यालयांत महाराष्ट्रांतलीं 25 भुरगीं प्रवेश परिक्षेंत पास जाल्यान तांकां प्रवेश दिवपा संबंदी वाळपय नवोदया विद्यालयान ‘वेट अँड वॉच’ अशें सांगिल्ल्यान पालकां मदीं परत बोवाळ पडला. 25 भुरग्यांक प्रवेश दिल्यार ह्या वाठारांतल्या भुरग्यांचेर अन्याय जातलो, हें आमी सोसून घेवचें ना अशें पालकांनी स्पश्ट केलां. मेळ्ळिल्ले म्हायती प्रमाण, नवोदय विद्यालयात महाराष्ट्रांतलीं 25 भुरगीं सवेंच्या वर्गांत पास जाल्ली. तांकां बनावट कागदपत्रां तयार करून विद्यालयान चाचणी परिक्षेंत भाग घेवपाक दिल्लो, असो आरोप जाला. सगळी भुरगीं पास जाल्यांत. हाका लागून हे प्रवेश भरती प्रक्रियेंत बोवळ जावपाचो भंय पालकांनी उक्तायला. प्रवेश दिवपाची प्रक्रिया पुरायपणान दुबावीत आसा. नवोदय विद्यालयांत फकत उत्तर गोंयच्या भुरग्यांक प्रवेश दिवपाक मेळटा. अशें आसून भायल्या राज्यांतल्या भुरग्यांक प्रवेश कसो आनी नेमको कोणे दिलो असो प्रस्न पालकांनी विचारला.
हो मुद्दो फाटलें 15 दीस गाजता. ताका लागून विद्यालयाच्या पुराय प्रवेश प्रक्रिये कडेन सगळ्यांचें लक्ष आसा. 18 एप्रील सावन ज्या भुरग्यांक प्रवेश परिक्षेंत वेंचून काडल्यांत तांकां प्रवेश दितात. ताका लागून 25 भुरग्यांक प्रवेश दिवचे पयलीं ताचो गांभिर्यान विचार करचो अशीं शिटकावणी पालकांनी दिल्या. मामलेदारा कडल्यान पालकांक दिल्ले निवेदन विद्यालयांत धाडलां. हांचेर चवकशी चालू आसा अशीं म्हायती विद्यालयाच्या वरिश्ठ अधिकाऱ्यान दिल्या. मात, ह्या संदर्भांत विद्यालयाच्या वेवस्थापनान आतां मेरेन कसलो निर्णय घेतिल्लो ना. वेट अँड वॉच अश्या प्रकारची प्रतिक्रिया तांणी दिल्या.
हाका लागून भुरग्यांक प्रवेश दितले काय ना असो प्रस्न पालकांनी विचारला. आता मेरेन ह्या 25 भुरग्यां मदल्या एकल्याकय प्रवेश दिल्लो ना. मात विद्यालयान आपलीं भुमिका स्पश्ट केल्यां. ह्या 25 भुरग्यांक प्रवेश दिल्यार पालक बोवळ करूंक शकतात. वाळपय मामलेदारान निवेदन दिल्या उपरांत ह्या विशयांची चवकशी करतले अशें आस्वासन दिलां. मामलेदारान प्रकरणाची खोलायेन चवकशी करपाचे निर्देश दिल्यात.
महाराष्ट्रातल्या 25 भुरग्यांक प्रवेश चाचणी परिक्षेंत प्रवेश दिल्यान थळाव्या भुरग्यांचेर शैक्षणीक नदरेन अन्याय जाला. हें विद्यालय पुरायपणान निवासी स्वरुपाचें आसा. हांगा बरें शिक्षण मेळटा. केंद्र सरकाराच्या माध्यमांतल्यान ह्या विद्यालयाचें कामकाज चलता. पुरायपणान फुकट शिक्षण मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
