भांगरभूंय | प्रतिनिधी
फाटल्या तीन वर्सां सावन सत्तरी तालुक्यातल्या तरणाट्या खेळगड्यां खातीर संद निर्माण करपी वाळपय चॅम्पियन ट्रॉफीचो तिसरो चवथो टप्पो अंदूं 29, 30 आनी 31 जानेवारीक आयोजीत केलां. ही सर्त नाणूस मैदानाचेर आयोजीत केल्या आनी हातूंत 12 पंगड वांटो घेतले.
सत्तरी तालुक्यातल्या वट्ट 130 खेळगडे आनी हेर तालुक्यातले खेळगडे हातूंत वांटेकार जातले. ह्या खातीर सत्तरी तालुक्यातल्या खेळगड्यांक ही सर्त एक बरी संद निर्माण करपी आसतली. हे संबंदी ट्रॉफी आनी जर्सीचें अनावरण केलें. वाळपय सेलिब्रेशन हॉलांत आयोजीत केले हे कार्यावळीक नगराध्यक्ष सेहझीन शेख, नगरसेवक विनोद हळदणकार, रामदास शिरोडकार, शेख फैजल, म्हावूस पंचायतीचे सरपंच सोमनाथ काळे, खोतोडें पंचायतीचे सरपंच नामदेव राणे विवीध पंचायतीचे सरपंच, पंच वांगडी, वाठारांतले प्रतिश्ठीत नागरीक हाजीर आशिल्लें.
फाटल्या तीन वर्सां सावन ही सर्त वाळपय वाठारांत आयोजीत करतात. ह्या सर्तीच्या अध्यक्षपदी भलायकी मंत्री विश्वजीत राणे आसात. आयोजन समिती विशेश परिश्रम घेतात. तीन दिसाचे हे सर्तीचें उक्तावण 29 जानेवारीक भलायकी मंत्री आनी सर्तीचे आयोजन समितीचे अध्यक्ष विश्वजीत राणे हांच्या हस्तुकीं करतले. ह्या वेळार विवीध क्षेत्रातले मानेस्त खास हाजीर आसतलें. ही सर्त रातच्या वेळार जातली आनी सर्तीची पुराय तयारी जाल्या अशी म्हायती सर्तीचे आयोजन समितीचे मुखेली शेख फैझल हांणी पत्रकारां कडेन उलयतना दिली. हे सर्तीच्या निमतान सत्तरी तालुक्यातल्या तरणाट्या खेळगड्यांक बरी संद मेळ्ळी. हे सर्तीतल्यान तांणी बरे खेळचे आनी अणभव घेवचो हांका लागून तांकां तांच्या खेळांत सुदारणा करपाक मेळटली अशें तांणी सांगले.
नगराध्यक्ष सेहझीन शेख हांणी सांगले अश्या सर्तीतल्यान भुरग्यां मदी उर्जा वाडता आनी उमेद निर्माण जाता. बरें खेळगड्यांक बरो अणभव मेळटा. दुसऱ्यांचो खेळ पळोवन स्वताच्या खेळांत सुदारणा करपाची संद भुरग्यांक मेळटा. हे खातीर अशे तरेच्यो सर्ती सतत घडोवन हाडप अशी विनंती तांणी केली.
सर्तीच्या इनामां भेटवण सुवाळ्याक पर्यें मतदार संघाची आमदार डॉ. देविया राणे हाजीर रावतली. हे सर्तीचो खेळगड्यांनी बरो फायदो करून घेवचो अशी विनंती आयोजकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
