भांगरभूंय | प्रतिनिधी
गांवांतल्या तरणाट्यांची आक्रमक भुमिकाः 16 वरांनी वीज पुरवण जाग्यार
भांगरभूंय । प्रतिनिधी
वाळपयः सत्तरी म्हालाच्या नगरगांव पंचायत वाठारांतल्या नानोडें, कोदाळ, साठरे, खुद्र, साटरे ह्या गांवांनी शेनवारा दीसभर वीज पुरवण बंद पडिल्ली. ताका लागून खुबळिल्ल्या थळाव्या तरणाट्यांनी वाळपय वीज कार्यालयाच्या सबस्टेशनाचेर मोर्चो व्हरून आक्रमक भुमिका घेतली. ते उपरांत हाची दखल कार्यालयाक घेवची पडली. ताका लागून 16 वरां खडीत जाल्ली वीज पुरवण फक्त अर्द वरांत सुरळीत जाली. हाचे वयल्यान दीसभर अधिकाऱ्यांनी हे संबंदांत घाळपणां केल्ल्याचें स्पश्ट जालां. गोंय सरकाराच्या वीज खात्याच्या ह्या गचाळ कारभाराचेर सध्या लोकांनी खर तिडक उक्तायल्या.
मेळिल्ले म्हायती प्रमाण, शेनवारा दीसभर नानोडें, कोदाळ, साटरे ह्या वाठारांतली वीज पुरवण बंद पडिल्ली. सध्या भुरग्यांच्यो परिक्षा चालू आसात. ताका लागून खंडीत वीज पुरवणेचो विद्यार्थ्यांच्या अभ्यासाचेर परिणाम जाता. तशेंच सध्या उबाळ सुमारा भायर वाडला, ताचोय लोकांक त्रास जाता.
खूब खेपे विनवणी करून लेगीत वीज खात्याच्या अधिकाऱ्यांनी कानार हात दवरिल्ले. अखेर रातच्या 10 वरांच्या सुमाराक थळाव्या तरणाट्यांक वाळपयच्या वीज कार्यालयाचेर मोर्चो व्हरचो पडलो. 50 परस अदीक तरणाट्यांनी वाळपयच्या वीज कार्यालयाच्या सबस्टेशनाचेर मोर्चो व्हरून हे संबंदांत थळाव्या अधिकाऱ्यांक धारेर धरले. जे मेरेन गांवांतली वीज पुरवण जाग्यार पडना, ते मेरेन सबस्टेशना वयल्यान हालचे नात, अशी शिटकावणी तरणाट्यांनी दिली. अखेर उपाय नाशिल्ल्यान हाजीर आशिल्ल्या कर्मचाऱ्यांनी बेगोबेग घडणुकेचे सुवाचेर धांव मारून फक्त अर्द वरांत नीद पुरवण सुरळीत केली. ह्या वाठारांतल्या ट्रान्सफोर्मराचेर ल्हानसो बिघाड जाल्लो. अर्द वरा भितर तो दुरुस्त करताच गांवांत लायटी पेटल्यो. अर्द वराच्या कामा खातीर वयल्या तिनूय गांवांतल्या लोकांक 16 वरां लायट नाशिल्ल्यान त्रास सोंसचो पडलो. मजगतीं, वयल्या तिनूय गांवांनी तीन वर्सां आदीं केबल घालून वीज पुरवण केल्ली. मात तो केबल परतून परतून नादुरुस्त जाता, ताका लागून अनियमीत वीज पुरवणेक फुडो करचो पडटा. ह्या केबलाचे सुवातेर भुंयगत वीज केबल घालचो, अशी मागणी केले उपरांत कांय दिसां आदीं भुंयगत वीज केबल घालपाचें काम सुरू केलां.
अर्द वराच्या कामा खातीर 16 वरां त्रास
फक्त अर्द वराच्या कामा खातीर तीन गांवांतली वीज पुरवण 16 वरां बंद आशिल्ली. सकाळच्यान सांज मेरेन साबार खेपे अधिकाऱ्यांक फोन करून वीज पुरवण जाग्यार घालपाची विनवणी केल्ली, मात तांणी मातूय लक्ष दिवंक ना. हाचे वयल्यान वीज खात्याचो कारभार कितलो गचाळ आसा, तें कळटा, अशें हे विशीं पत्रकारां कडेन उलयतना थळाव्या तरणाट्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
