भांगरभूंय | प्रतिनिधी
वास्को स्टेशन मास्तराक भेटयलें निवेदन
वास्को: वालंकिणी दर्शना खातीर वचपी भक्तां खातीर दक्षीण अस्तंत रेल्वेन अतिरिक्त रेल्वे सोडची. तशेंच 27 वेर वास्को सावन सुटपी खास रेल्वे गाडी थंय दोन दीस थांबोवची, जेणे करून भाविकांक वेवस्थीत देवदर्शन घेवंक मेळटलें. तेच बरोबर नोव्हेनाक हाजीर रावंक मेळटलें. अशें निवेदन वास्कोचे आमदार कृष्णा साळकार आनी मुरगांवचे नगराध्यक्ष लिओ रॉड्रिगीश हांणी वास्को रेल्वे स्टेशनाचे स्टेशन मास्तर बिपूल कुमार हांकां दिलें. बिपूल कुमार हांणी ही मागणी वरिश्ठां मुखार दवरपाचें आस्वासन दिलें.
निवेदन दितना आदली नगराध्यक्ष क्रिस्तिलिना कुयेलो, आदली नगराध्यक्ष लविना डिसोझा, आदली नगराध्यक्ष फियोला रेगो, नगरसेवक गिरीश बोरकार, नगरसेवक दीपक नायक आनी हेर हाजीर आशिल्ले.
वास्को सावन सद्दां सोमारा वालंकिणी वचपी रेल्वेक भाविकांची व्हड प्रमाणांत गर्दी आसता. ताका लागून खूबशा भाविकांक वालंकिणी वचूंक मेळना. वालंकिणीक भाविकांक वचपा खातीर अतिरिक्त रेल्वेगाडी सोडपाची गरज आमदार साळकार हांणी उक्तायली. वालंकिणी दर्शना खातीर खासा रेल्वे सोडटले. 27 वेर वास्को रेल्वे स्टेशना सावन खास रेल्वे सुट्टली. ती 28 वेर वालंकिणी पावले उपरांत त्याच दिसा परतून येवपा खातीर सुट्टली. ते खातीर भाविकांक गडबडींत वालंकिणीचें दर्शन घेवचें पडटलें. तांकां हेर धर्मीक कार्य तशेंच नोव्हेना खातीर हाजीर रावंक मेळचें ना. हे खातीर ही रेल्वे 28 वेर पावले उपरांत थंय दोन दीस थांबो घेवचो आनी उपरांत ती 30 वेर वास्को सोडची अशी मागणी साळकार हांणी केल्या. हे खातीर भाविकांची गैरसोय पयस जातली.
आपूण वरिश्ठ रेल्वे अधिकाऱ्यां कडेन हे विशीं उलयतलों अशें बिपूल कुमार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
