भांगरभूंय | प्रतिनिधी
पणजी: सांग्यार कावरे-पिर्ला पंचायत वाठारांत येवपी काजूर गांवांत इश्टाचे पार्टी वेळार घडिल्ले एके घडणुकेंत २२ वर्सां पिरायेचे तरणाटेक मरण आयिल्लें. फकांडां करतना रायफलांतल्यान चुकून मारिल्लो फार सरळ तन्वी घाडी हाचे मानेक लागिल्ल्यान ताचो जीव गेलो. ह्या प्रकरणांतलो मुखेल दुबावीत श्वेत गावडे (रा. पाळी) हाका केपें पुलिसांनी अटक केल्या. केपें पयलो वर्ग न्यायालयान सोमारा ताका चार दिसांची पुलीस बंदखण दिल्ली. हे घडणुकेक लागून पुराय वाठारांत बरोच बोवाळ जाला. तशेंच शस्त्रां वापरपाचो प्रस्न मुखार आयला.
मजगतीं, पुलिसांनी गुन्यांवांत वापरिल्ले रायफल जप्त केलां. तें कोणाच्या नांवार आशिल्लें आनी ताचो स्रोत कितें, हाचो सोद पुलीस घेतात.
हे विशीं मेळिल्ले म्हायती प्रमाण, आयतारा, १२ एप्रिलाक काजूरच्या एका घरांत पांच इश्टांचो ग्रुप पार्टी खातीर जमिल्लो. तन्वी घाडीय भितर आशिल्लें. पार्टी सुरू आसतनाच थंय एक एअर रायफल हाडली. दुबावीत श्वेत गावडे हांणी फकांडांनी तन्वीचे दिकेन रायफल व्हेलें आनी ‘फार मारुं?’ अशें फकांडांनी विचारून ट्रिगर ओडलो. भितर एक गुळी आशिल्ली आनी तातुंतल्यान भायर सरिल्ली गुळी तन्वीचे मानेचे दावे वटेन लागली. गुळी लागतांच बरेंच रगत व्हांविल्ल्यान तन्वीक जाग्यारूच मरण आयलें.
केपें पुलिसांनी श्वेत हाका ताब्यांत घेतलो. पुलिसांनी दिल्ले म्हायती प्रमाण, ही रायफल जाच्या घरांत पार्टी आशिल्ली ताच्या मावाची. ती तो शेतांत येवपी बकीं धांवडावपाक वापरतालो. मात, हें शस्त्र वैध परवान्या सयत आशिल्लें काय बेकायदेशीर, हे नदरेन आतां पुलीस तपास करतात. ह्या प्रकरणांत भारतीय न्याय संहितेच्या कलम १०३ (१) आनी शस्त्र कायद्याच्या विवीध कलमां खाला गुन्यांव नोंद केला. हातूंत अवैध शस्त्र बाळगप आनी ताच्या वापराक लागून मरण येवप अश्या गंभीर गजालींचो आसपाव आसा.
तन्वीची कूड पोस्टमार्टमा खातीर गोमेकॉंत धाडिल्ली. मुळाव्या वैजकी अहवाला प्रमाण, तिका मरण रगत चड व्हांविल्ल्यान आयिल्ल्याचें स्पश्ट जालें. पोस्टमार्टमा उपरांत तिची कूड सोयर्यांचे सुवादीन केली. पुलीस निरीक्षक प्रशल देसाय हांच्या मार्गदर्शना खाला पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
