भांगरभूंय | प्रतिनिधी
मडगांव, प्रतिनिधी : वार्का नोवांगुळी हांगा बुधवारा रातचें गाडयेन दोनचाकीक धपको दिवन थंयच्या पळ काडली. ह्या धपक्यान दोनचाकी चालक अशित साहा (३१) हाका आक्ताक मरण आयलें. कोलवा पुलीस हे गाडयेचो सोद घेतात.
मेळिल्ले म्हायती प्रमाण, बुधवारा रातच्या सुमार साडेबारा वरांचेर वार्काच्या नोवांगुळी वाठारांत रस्त्याचेर हो अपघात जालो. अशित साहा हो तरणाटो वसवाडो बाणावले रावता. तो फ्लिपकार्टांत काम करतालो. अशित साहा रातचो वार्काचे दिकेन वतना फाटल्यानच्यान वेगान येवपी इनोव्हा गाडयेन ताका धपको दिलो. अपघाता उपरांत गाडी चालक थंयच्यान पळ्ळो. गाडयेन दिल्लो धपको इतलो नेटान आसलो, दोनचाकी चालक रस्त्याचेर पडलो आनी झरकटत गेलो तेन्ना ताचो पांय शरिरा पसून वेगळो जालो. अपघाताची म्हायती मेळटाच कोलवा पुलीस घडणुके सुवातेर दाखल जाले. तांणी पंचनामो केल्या उपरांत आशिताची कूड दक्षीण गोंय जिल्हो हॉस्पिटलाच्या मोर्गांत धाडली. कोलवा पुलिसांक घडणुके सुवाते वयल्यान गाडयेची तुटिल्ली नंबरप्लेट मेळ्ळ्या. कोलवा पुलीस हे गाडयेचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
