भांगरभूंय | प्रतिनिधी
आचारसंहितेक लागून उदरगतीच्या कामांचेर निर्णय घेवपाक निर्बंध
भांगरभूंय । प्रतिनिधी
मडगांवः वार्का ग्रामसभेचे सुरवेकूच भरारी पंगडान भेट दिली. ग्रामसभेंत कसलेच तरेच्या उदरगतीच्या कामांचेर चर्चा वा निर्णय घेवचो न्हय हे अटीचेर ग्रामसभा चालू दवरपाक परवानगी दिली. ते प्रमाण वार्का ग्रामसभेंत अर्थसंकल्पा वयल्लया तजविचांचेर चर्चा केली आनी 1.78 कोटींचो 2024- 25 चो अर्थसंकल्प मंजूर केलो.
गोंयांत लोकसभा वेंचणुकेचे फाटभुंयेर आचारसंहिता लागू केल्या. आयतारा वार्का ग्रामसभा आयोजीत केल्या, अशी म्हायती मेळटाच भरारी पंगडान पंचायत सभाघरांत भेट दिली. सरपंच, पंच आनी पंचायत सचिवा कडेन भरारी पंगडांतल्या अधिकाऱ्यांनी ग्रामसभेंतल्या अजेंडाचेर चर्चा केली. वेंचणूक आशिल्ल्यान ग्रामसभेंत गांवांतली कसलींच उदरगतीचीं कामां करपाचो निर्णय वा थाराव संमत करचो न्हय. फक्त अर्थसंकल्पाचेर चर्चा करपाचे अटीचेर ग्रामसभा घेवपाची परवानगी दिली.
भरारी पंगडान अटी सयत ग्रामसभेक परवानगी दिले उपरांत सरपंच सेलू फर्नांडीस हांचे अध्यक्षते खाला ग्रामसभेक सुरवात जाली. ग्रामसभेंत फक्त अर्थसंकल्पांतले तरतुदींचेर चर्चा जाली. तातूंत खेळां संबंदांत निधीचे तरतुदींत वाड करची, गार्डनांतली साधनसुविधा सुदरावची आनी कोयराच्या प्रस्नाचेर चर्चा जाली. घराघरांतलो कोयर एकठांय करतना सॅनिटरी पॅड आनी डायपर हे सारक्यो वस्तू कोयरांतल्यान दितात. ह्यो तशेंच ओलो आनी सुको कोयर वेगळो करून दिवचो, हे खातीर दर प्रभागांनी जनजागृती कार्यावळी करपाचें थारायलें.
रस्त्या वयल्या लायटीं खातीर पंचायत लोकां कडल्यान कर शुल्क घेताली. मात सध्या रस्त्या वयल्या लायटींची देखभाल दुरुस्ती पंचायती कडेन ना. ताका लागून तें कर शुल्क रद्द करपाचो निर्णय घेतलो. घरपटी आनी गांवांतले हेर कराचें शुल्क एकठांय करचे खातीर एका मनशाची नेमणूक केली, लोकांक नोटिसो धाडल्यो, ते उपरांत सुमार 80 टक्के कराची वसुली करपाक येस मेळ्ळां, अशें पंचायती वतीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
