भांगरभूंय | प्रतिनिधी
मडगांव, प्रतिनिधी : वार्कांत फार्मसी सयत हेर पांच दुकानां फोडून रोख रकमे सयत चोरांनी लाखांचो माल चोरलो. मडगांवांय एका दुकानाचें शटर उगडून पांच हजार रुपया आनी मिठाय चोरली.
पुलीस गस्त घालतात अशें सांगतनाच मडगांवां पालिका इमारतीचे फाटले वटेन आशिल्ल्या पुलीस स्टेशना पसून एक किलोमिटरा परस उण्या अंतराचेर आशिल्लें रस्त्या कुशीकच्या पंजाबी लस्सी ह्या मिठायेच्या दुकानाचें शटर चोरांनी बिरेस्तारा रातीं उगडलें. तातुंतल्यान पाच हजार रुपया आनी मिठाय चोरांनी चोरली. सकाळीं हे विशीं दुकान धनयाक कळटांच तांणी मडगांव पुलीस स्टेशनाचेर हे विशीं कागाळ दिली.
दुसरे कडेन वार्का, फात्राडे वाठारांतली फार्मसी आनी वायन शॉप अशा पांच दुकानांक चोरांनी लक्ष्य केलें. दोग चोरांनी दुचाकीचेर येवन शटर उगडून दुकानांत प्रवेश केल्ल्याचें एके सीसीटीव्ही फुटेजींत दिसता. अपोलो फार्मसी सयत आनीक फर्मासींक चोरांनी लक्ष्य केलें. एके फर्मासींतल्यान १ लाख २५ हजार जाल्यार अपोलो फार्मसींतल्यान ४७ हजार रुपया, वायन शॉपांतल्यान सामानाची चोरी चोरांनी केली. वार्का आनी फात्राडे वाठारांतल्या पांच दुकानांतल्यान रोख रकमे सयत सुमार दोन लाखांचो माल चोरलो. कोलवा पुलिसांनी घडणुके सुवातेर पळोवणी केली. हे विशीं पुलीस फुडें तपास करतात.
मजगतीं, उत्सवाच्या काळांत चोरयेच्यो घडणुको घडिल्ल्यान पुलिसांचे गस्तींत वाड करची अशी मागणी दुकानदार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
