वायट दर्ज्याचें फर्निचर दिल्ल्यान चवगांचेर गुन्यांव दाखल

भांगरभूंय | प्रतिनिधी

पणजी, बातमीदार ः पणजेंतल्या लश्करी अभियांत्रिकी सेवेच्या (एमईएस) गॅरिसन अभियंत्यांच्या कार्यालयांत आनी वसणुकेंत वायट फर्निचराची पुरवण करून फटवणूक केल्ल्या प्रकरणांत केंद्रीय गुन्यांव तपास खात्यान (सीबीआय) एका कंत्राटदारा वांगडा एमईएसच्या तेन्नाच्या तीन अधिकाऱ्यां आड गुन्यांव नोंद केला.
केंद्रीय गुन्यांव तपास खात्यान (सीबीआय) दिल्ले म्हायती प्रमाण एमईएसन गॅरिसन अभियंतो कार्यालयान वेगवेगळ्या अधिकाऱ्यांच्या कार्यालयांक आनी तांच्या वसणुकांनी उच्च दर्जाचे सायल्याच्या लाकडाचें फर्निचर दिवपाक जुवारी नगरांतल्या लकी जनरल इंजिनिर अॅन्ड काँट्रॅक्टर्स हांकां 14 नोव्हेंबर 2018 कंत्राट दिल्लें. ते प्रमाण कंत्राटदाराक 2018 ते 2021 ह्या काळां मेरेन कंत्राट दिलें.
एप्रील 2019 वर्सा कंत्राटदारान 35 लाख 81 हजार 249 रुपयांचें वायट फर्निचर दिवन ताचें बिल दिलें. महेंद्र कुमार मखवाना हांणी फर्निचराच्या दर्ज्याची तपासणी करूंक ना. उपरांत ताणें वयली रक्कम कंत्राटदाराक दिवपाची प्रक्रिया पुराय केली. तेन्नाचे सहाय्यक अभियंतो राजेश गोपाल कृष्णन आनी आदेश्वर कुमार गुप्ता हांणी कंत्राटदाराक संबंदीत रक्कम दिली.
हे संबंदी साई लेबर कंत्राटदार को. ऑपरेटिव्ह सोसायटीन कागाळ दाखल करुन निकृश्ट दर्जो आनी कंत्राटाचो उल्लंघन केल्याची म्हायती दिली. उपरांत 9 ऑगस्ट 2019 दिसा तेन्नाचो गॅरिसन अभियंतो मनीष नायर हांणी संबंदीत फर्निचराचे नमुने केरळ रान संशोधन संस्थेक तपासणी खातीर धाडले. मागीर 17 सप्टेंबर 2019 दिसा अहवाल निगेटिव्ह आयलो. संस्थेन संबंदीत अहवालाची प्रत तेन्नाचे सहाय्यक अभियंतो राजेश गोपाळ कृष्णनाक ईमेल वरवीं धाडली. अशें आसून लेगीत संबंदीतानी अहवाल लिपून दवरलो आनी कसलीच कारवाय करूंक ना. उरफाटें उरिल्ली 11.50 लाख रुपया कंत्राटदाराक दिली.
हे संबंदी सीबीआय कडेन कागाळ आयले उपरांत प्राथमीक चवकशी सुरू केली. तांतूत महेंद्र कुमार मखवाना, राजेश गोपाल कृष्णन, आदेश्वर कुमार गुप्ता आनी कंत्राटदार सुरजीत सिंग ह्या चार जाणांनी निकृश्ट दर्जाचे फर्निचराची पुरवण करून फटवणूक केल्ल्याचे मुखार आयले. ते प्रमाण सीबीआयचे अतिरिक्त अधीक्षक आलोक कुमार हांच्या मार्गदर्शना खाला उपअधीक्षक अर्जुन कुमार मौर्य हांणी वयल्या चारुय दुबावितां आड गुन्यांव नोंद केला.