भांगरभूंय | प्रतिनिधी
वेंचणूक आयोगान केली वेबसायटीचेर वळेरी जाहीर
नवी दिल्ली, खबरां संस्था: सर्वोच्च न्यायालयाचे आदेश पाळून वेंचणूक आयोगान इलॅक्टोरल बॉन्डसचो तपशील बिरेस्तारा आपले वेबसायटीचेर जाहीर केलो. हातूंत फकत २० कंपन्यांनी वट्ट ५ हजार ४२० कोटी रुपयांचे (वट्ट ४४.५९ टक्के) इलॅक्टोरल बॉन्डस विकते घेतिल्ल्याचें स्पश्ट जालां. हातूंत फ्युचर गेमींग आनी मेघा इंजिनियरिंग हांणी एप्रील २०१९ ते जानेवारी २०२४ ह्या काळांत सगळ्यांत चड बॉन्ड घेतिल्ले.
दक्षीण भारतांतले ‘लॉटरी किंग’ सँटिएगो मार्टीन हांचे ‘फ्युचर गेमिंग अँड हॉटेल सर्व्हिसेस’ हे कंपनीन १ हजार ३६८ कोटींचे बॉण्ड विकत घेतले. जाल्यार आंध्र प्रदेशांतल्या पी. व्ही. कृष्णा रेड्डी आनी पी. पी. रेड्डी ह्या भावांच्या मेघा इंजिनियरिंग ह्या बांदकाम मळा वयल्या कंपन्यांनी ९६६ कोटींचे बॉन्ड विकते घेतले. अर्थपुरवण मळार चार कंपन्यांनी १२३ कोटींचे बॉन्डस फाटल्या पांच वर्सांनी विकत घेतल्यात. हातूंत बजाज फायनान्स, पिरामल एन्टरप्रायझेस, एडलवायज आनी मुत्यूत फायनान्स हांचो आसपाव आसा. मात ह्या कंपन्यांनी बॉन्डस् वरवीं खंयच्या पक्षाक देणग्यो दिल्यात हें आजूनय स्पश्ट जावंक ना. कंपनी कडेन विचारलें तेन्ना रोखडीच म्हायती मेळूंक ना अशें वृत्तसंस्थेन म्हणलां.
इलॅक्टोरल बॉन्डस् विकते घेतिल्ल्या कंपन्यां प्रमाण बॉन्डस् जमा केल्ल्या राजकीय पक्षांची तारखे प्रमाण वळेरीय वेंचणूक आयोगान जाहीर केल्या. हातूंत अपेक्षे प्रमाण भाजप, कॉंग्रेस, तृणमूल कॉंग्रेस, भारत राष्ट्र समिती आनी हेर पक्षांक सगळ्यांत चड दणग्यो मेळ्ळ्यात.
वाहन, विमान कंपन्यांनीय विकते घेतल्या
‘इंडिगो’ची भागीदार इंटरग्लोब एव्हिएशनच्या तीन उपकंपन्यांनी ३६ कोटी रुपयांचे बॉन्डस् विकत घेतल्यात. तशेंच इंडिगोच्या प्रवर्तकांनीय ७ एप्रील २०२१ दिसा २० कोटींचे बॉन्ड्स विकत घेतल्यात. स्पायसजेट हे विमान कंपनीन जानेवारी ते जुलय २०२१ ह्या काळांत ६५ लाखांचे बॉन्डस् घेतिल्ले. वाहन उद्देगांतल्या बजाज ऑटोन २५ कोटी, मारुती सुझुकीन २० कोटी आनी टीव्हीएस मोटर्सान १० कोटींचे बॉन्ड्स फाटल्या पांच वर्सांनी विकत घेतिल्ल्याचें स्पश्ट जालां.
देशांतले टॉप २० ‘देणगीदार’ कोण?
ह्या २० देणगीदारांमदीं लॉटरी वेवसायीक, थर्मल पॉवर वेवसायीक ते मोबायल नेटवर्कींग कंपन्यांचोय आसपाव आसा.
१. १३६८ कोटी: फ्युचर गेमींग अँड हॉटेल सर्व्हिसेस प्रायव्हेट लिमिटेड
२. ९६६ कोटी: मेघा इंजिनिअरिंग ऍण्ड इन्फ्रास्टक्चर लिमिटेड
३. ४१० कोटी: क्विक सप्लाय चेन प्रायव्हेट लिमिटेड
४. ३७७ कोटी: हल्दिया एनर्जी लिमिटेड
५. ३७६ कोटी: वेदांता लिमिटेड
६. २२५ कोटी: एस्सेल मायनिंग अँड इंडस्ट्रीज लिमिटेड
७. २२० कोटी: वेस्टर्न यूपी पॉवर ट्रान्समिशन कंपनी
८. १९८ कोटी: भारती एअरटेल
९. १९५ कोटी: केवेंतर फूड पार्क इन्फ्रा लिमिटेड
१०. १९२ कोटी: एमकेजे एंटरप्रायजेस लिमिटेड
११. १८६ कोटी: मदनलाल लिमिटेड
१२. १६२ कोटी: यशोदा सुपर स्पेशालिटी हॉस्पिटल
१३. १४६ कोटी: उत्कल ऍल्युमिनियम इंटरनॅशनल लिमिटेड
१४. १३० कोटी: डीएफएल कमर्शियल डेव्हलपर्स लिमिटेड
१५. १२३ कोटी: जिंदाल स्टील अँड पॉवर्स लिमिटेड
१६. ११९ कोटी: बी. जी. शिर्के कन्स्ट्रक्शन टेक्नोलॉजी प्रायव्हेट लमिटिडेड
१७. ११५ कोटी: धारिवाल इन्फ्रास्ट्रक्चर लिमिटेड
१८. ११३ कोटी: अवीस ट्रेडिंग फायनान्स प्रायव्हेट लिमिटेड
१९. १०७ कोटी: टोरंट पॉवर लिमिटेड
२०. १०५ कोटी: बिर्ला कार्बन इंडिया प्रायव्हेट लिमिटेड
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
