भांगरभूंय | प्रतिनिधी
बिलां दुरुस्त करून नवी बिलां जारी करपाक सुरवातः वीज मंत्री
पणजीः लोड वाडयिल्ले कारणान वाडीव आयिल्ली लायटीची बिलां रद्द जाल्यात. वीज खात्यान 7.05 लाख बिलां सारकी करपाक सुरवात केल्या आनी गिरायकांक नवी बिलां जारी करतले. जर कोणी दंड भरला आसत जाल्यार तें पयशे गिरायकांक नव्या बिलांत वजा जावन येतले, अशी म्हायती वीज मंत्री सुदीन ढवळीकार हांणी दिली.
पणजे विद्युत भवनांत घेतिल्ले पत्रकार परिशदेंत मंत्री सुदीन ढवळीकार उलयताले. ह्या वेळार वीज खात्याचे मुखेल वीज अभियंते स्टिव्हन फर्नांडीस हजर आसले.
जे आश्वासन मुख्यमंत्री डॉ. प्रमोद सावंत हांणी दिल्ले ते आमी ह्या म्हयन्यांत पुराय करपाचे यत्न सुरू केल्यात, अशें ढवळीकार हांणी सांगलें.
नोव्हेंबर ते आतां मेरेन सुमार 8 म्हयन्यांत लोड वाडिल्ले कारणान जायत्या लोकांची बिलां सारकी करपाक सुरवात केल्या आनी ही 7.05 लाख बिलां सारकी करून लोकां मेरेन पावयतले. उपरांत तरी लेगीत बिलां भितर चुको आसल्यार गिरायकांनी आपल्या लागीच्या सहाय्यक अभियंत्याक वचून मेळचे. आमचे मुखेल अभियंतेच्या फुडारपणा खाला एक वर्सा भितर ह्यो चुको जाग्यार घालतले, अशीं म्हायती ढवळीकार हांणी दिली.
बरोच तेंप जालो वेगवेगळ्यो गजाली घडत गेल्यो. पुण पयलीच्या तेंपार ह्यो पोरण्यो गजाली कोणींच लक्षात घेवंक ना. पोईंट 2 प्रोग्रामा खाला ज्या लोकांनी दोन बल्बा खातीर जोडणी घेतिल्ली त्याच जोडणीचेर व्हडलीं उपकरणां चलतात. ज्यो कितें त्रुटी आसा त्यो सरकार आनी खात्याच्या माध्यमांतल्यान सोदपाक सांगला, अशें ढवळीकार हांणी सांगलें.
आतां सिंगल फेज वीज जोडणी आशिल्ले मिटरां खातीर 5 किलो वॉट लोड मंजूर केला आनी थ्री फेज वीज जोडणी खातीर 10 किलो वॉट लोड मंजूर केला. जर ताचे परस लोड वाडल्यार गिरायकांनी तीन म्हयन्या भितर लोड वाडोवपा खातीर ऑनलायन अर्ज करचो, अशीं घोशणा मुखेल वीज अभियंते स्टीव्हन फर्नांडीस हांणी केल्या.
जर सिंगल फेज जोडणी आशिल्ल्या गिरायकांचो लोड 1 किलो वॉट वयल्यान 3 किलो वॉट मेरेन वाडटा जाल्यार ताका अर्ज करपाची गरज ना, तांका 5 किलो वॉट मेरेन लोड वाडोवपाची मुभा आसा. जर हाचे परस लोड वाडलो जाल्यार तांणी थ्री फेज जोडणी घेवची. थ्री फेजा गिरायकांक 10 किलो वॉट मेरेन लोड वाडोवपाची मुभा आसा आनी हो लोड वाडलो जाल्यार नवे कनेक्शना खातीर अर्ज करचो पडटलो, अशीं म्हायती फर्नांडीस हांणी दिली.
लोड मर्यादा सोंपले उपरांत वाडीव लोडा खातीर गिरायकांनी तीन म्हयन्या भितर ऑनलायन अर्ज करचे. पुण हे तीन म्हयन्याचे काळात वाडीव लोडा खातीर तांचे कसलोच दंड वसूल करचे नात. तीन म्हयने जावन लेगीत जर लोड वाडोवंक ना जाल्यार तांकां नोटीसी जारी करतले, अशें फर्नांडीस हांणी म्हणलें.
——————
गोंयांतल्या 70 टक्के गिरायकांक लोड वाडयिल्ले कारणान वाडीव बिलां आयल्यात. फाटल्या 8 म्हयन्यांची भरूंक नाशिल्ली 7.05 लाख बिलांचे 43.51 कोटी हे माफ करपाक सुरवात जाल्या. हो दंड आमी येणावळ एकठांय करपा खातीर न्हय तर घराब्याची सुरक्षा सुनिश्चीत करपा खातीर केल्लो. काय जाणांच्या घरांत. 0.25 किलो वॉटच्यो वायरी आसात आनी त्या वायरींचेर 12 किलो वॉट्ट इतलो दबाव येता. ह्या कारणाक लागून शॉर्ट सर्किट जावन उजो लागपाची शक्यताय आसा, अशी चत्राय मुखेल वीज अभियंते स्टिव्हन फर्नांडीस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
