भांगरभूंय | प्रतिनिधी
७५ पुलीस प्रशिक्षणार्थी पुलीस खात्याचे सेवेंत दाखल
वाळपय, प्रतिनिधी: सध्या गोंयांत व्हडा प्रमाणांत अपघात वाडपाक लागल्यात. ही खरीच हुस्को करपा सारकी गजाल. समाजान हे बाबतींत सहकार्य करपाची गरज आसा. तरी पुलिसांनी हें आव्हान स्विकारून अपघातांचें सत्र आडावपा यत्न करचो. समाजाची राखण करपाची जापसालदारकी पुलिसांची जावन आसा. हाका लागून आपले जापसालदारेक पसून कोणूच वेगळे वटेन वच्चे ना ही जतनाय घेयात. कायदो पाळात. पुलिसांच्या बावट्याक मान दियात. कसल्याय आव्हानांक तोंड दिवपाची तयारी दवरात असो उलो गोंयचे पुलीस डिजीपी जसपाल सिंग हांणी मारलो.
वाळपय पुलीस प्रशिक्षण केंद्रांत ४९ व्या बॅचाच्या उरिल्ल्या ७५ जाणांक आयज प्रामाणीक आनी गोपनीयतेचो सोपूत दिवन तांकां खात्यांत रुजू करून घेतले. ह्या वेळार आयोजीत दिक्षांत सुवाळ्याक जसपाल सिंग उलयताले. पयल्या टप्प्यांत पास जावप शक्य जावंक ना म्हणून कोणेंच वायट मानून घेवचें न्हय. नवे इत्सेन आनी नवे उर्जेन सेवेंत दाखल जायात. आपली पात्रताय सिद्ध करात अशी मागणी तांणी फुडें उलयतना केली. आतंकवाद हो देशा खातीर व्हड धोको. आमचे सैनीक शिमेचेर राखण करतात. तरीय समाजांत लिपून आशिल्ल्या आतंकवादी विचारांक पयस करून शांतिकाय निर्माण करपाचो यत्न करात, अशेंय तांणी फुडें म्हणलें.
रस्तो अपघात दिसान दीस वाडतूच आसात. ताका लागून दरेकल्यान कायदो पाळचो. घुवळे वखदां घेवप हीं चिंतेची गजाल. हे खातीर समाजाच्या सहकार्याची गरज आसा. मात पयल्या पांवड्यार पुलिसांची कामगिरी हे म्हत्वाचें पावल आशिल्ल्याचें सांगून सगळ्या धर्माचो आदर करात अशी मागणी जसपाल सिंग हांणी केली.
ह्या वेळार माचयेर उत्तर गोंय पुलीस अधीक्षक, विद्यालयाच्यो प्राचार्य सुचिता देसाय आनी विद्यालयाचो हेर शिक्षक वर्ग आनी पुलीस खात्यांतले अधिकारी हाजीर आशिल्ले.
सुरवातेक पुलीस डी जी पी जसपाल सिंग हांणी परेडची पळोवणी केली. उपरांत प्राचार्य सुचिता देसाय हांणी सगळ्यांक गोपनीयतेचो सोपूत दिलो. ४९ व्या बॅचांत वट्ट ७५ जाण पास जाल्ले. तांकां तीन म्हयन्याचो वाडोवन प्रशिक्षण काळ दिला. तो आयज पुराय जालो. हाका लागून ह्या ७५ प्रशिक्षणार्थीं मदीं ६५ दादले आनी १० बायलांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.