भांगरभूंय | प्रतिनिधी
म्हापशें : वागातोर परवानगे बगर उक्ते सुवातेर रातभर बेकायदो ‘सर्कस एक्स नामस क्रे’ नांवाचो म्युझीक इव्हेंट चलता. ह्या इव्हेंटच्या व्हडल्या आवाजाच्या संगीताक लागून शांतिकाय इबाडटा, तेन्ना आयोजकांचेर खर कारवाय करची अशी मागणी हणजूण-कायसूव पंचायतीन केल्या.
सरपंच लक्ष्मीदास चिमुलकार हांणी ही मागणी गोवा प्रदूषण नियंत्रण मंडळ, बार्देस उपजिल्लोधिकारी आनी हणजूण पुलिसांकडेन केल्या. २८ डिसेंबर ते ३१ डिसेंबर ह्या काळांत आयोजीत इव्हेंटा आड सोमार, ३० डिसेंबराक सरपंच चिमुलकार हांणी हें पत्र संबंदितांक धाडलें.
सर्वे क्रमांक २०६/१ चे उक्ते सुवातेर ही वेवसायीक संगीत कार्यावळ सुरू आसा. रातचीं ८ ते सकाळीं मेरेन ही कार्यावळ चालूच आसता. पंचायतीची परवानगी घेनासतना ती सुरू आशिल्ल्यान पंचायत राज कायदो आयोजकांनी मोडिल्ल्याचें ह्या पत्रांत सरपंचांनी नमूद केलां.
सरपंच लक्ष्मीदास चिमुलकार हांणी सांगलें, ही कार्यावळ सगळे नेम मोडटा. हाका लागून उपद्रव आनी विध्वंस निर्माण जाता. तशेंच ही कार्यावळ थळाव्यांची शांतिकाय पुरायेन इबाडपी आसा. आयोजक तशेंच जमीन धनयाचेर खर कारवाय करपाची मागणी आमी प्रदुशण मंडळ आनी संबंधितां कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
