भांगरभूंय | प्रतिनिधी
अखेरेक कर्नाटकाचे मुख्यमंत्री सिद्धरामय्या (77) हांणी पदाचो राजिनामो दिलो. आतां तांच्या जाग्यार चड करून डी के शिवकुमार (64) नवे मुख्यमंत्री जातले. थारिल्ले अडेज – अडेज वर्सांचे कबलाती प्रमाण तांणी मुख्यमंत्री पद सोडलां, अशें म्हणटात, मात कांय जाणकारांच्या मतान, पयल्या दिसा पसून सुरू आशिल्ल्या सत्तासंघर्शाचो हो परिणाम. काँग्रेस जिखली तेन्नाच परंपरे प्रमाण, मुख्यमंत्री कोणें जावचें हाचे वयल्यान रागार, फुगार जावपाचे प्रकार जाल्ले. पक्षाचे राष्ट्रीय फुडारी राहूल गांधीन सांगलें जाल्यार हांव दुसऱ्याच खिणाक पद सोडटलों, अशें सिद्धरामय्या अदीं मदीं सांगताले. 20 मेक तांच्या सरकाराक तीन वर्सां पुराय जाल्लीं. उपरांत तांकां अटकीच दिल्ली आपयले आनी तांणी प्रसंग वळखून राजिनामो दिवपाचें थारायलें आनी तो दिलोय बी. ओबीसी फुडाऱ्या कडेन आडनदर आनी आरोप जाल्ल्या फुडाऱ्याक पद ह्या मुद्द्या वयल्यान कर्नाटकांत राजकारण तापपाक शकता.
मे 2023 त सिद्धरामय्या आनी डी के शिवकुमार हांची मेहनत, वेंचणूक वेवस्थापन, सोशल इंजिनियरिंगाक लागून काँग्रेसीक 224 मदले 135 जागे मेळिल्ले. त्या वेळार दोगांयनी मुख्यमंत्री पदाचेर दावो केल्लो. वादूय जाल्लो. पांच दीस बसका चलताली. अखेर पिरायेन, राजकारणांत ज्येश्ठ म्हणून सिद्धरामय्या हांकां कदेल मेळ्ळें. त्या वेळार पत्रकाराच्या एका प्रस्नाक जाप दितना शिवकुमार हांणी सांगिल्लें, ‘सरकार पांच वर्सां तिगतलें. मात आपूण पांच वर्सां मुख्यमंत्री पदार रावतलों, हे विशीं सिद्धरामय्या हांणी कांय सांगूंक ना’. कांय जाणांक दिसता, तीन वर्सां जावनूय मुख्यमंत्री कदेल सोडिना म्हूण शिवकुमार हांणी बंड करपाचो निर्णय घेतिल्लो, ताका लागून बेगोबेग हो बदल करून खदखदपी उज्याचेर उदक रकयलां. फाटल्या 20 नोव्हेंबराक गटबाजी, आरोप, प्रत्यारोपांचें रोंबाट वाजपाक सुरवात जाल्ली. पूण सिद्धरामय्या कानांत बोटां घालून ओग्गी आशिल्ले. देखून दिल्लीच्यान आपोवणें आयलें. सिद्धरामय्या हांणी थंयूय निश्ठावान समर्थकां सयत शक्ती प्रदर्शन केलें. उपरांत पक्ष फुडाऱ्यांनी समजायतकच, ते चार पावलां फाटीं सरले. आतां शिवकुमार हांचे खातीर मार्ग मेकळो जाला. वेंचणुकेक अजून 23 म्हयने आसात. आतां हो बदल काँग्रेसीक फायद्याचो थारता काय ना, तें कळटलेंच.
सिद्धरामय्या हांचे कारकिर्दींत राज्या वयलें रिणांचें वजें वाडलें, येवजण्यांक (रेवड्यो) लागून अर्थीक वजेंय हिस्पा भायर जड जालें, जातीचें सर्वेक्षण, आरक्षण, प्रशासनांत गटबाजी, जमीन, निविदा प्रकरण अशे साबार आरोप जाल्ले. मात, ते राजकी असो दावो सिद्धरामय्यान केल्लो. काँग्रेसी कडेन चड राज्यां नात, देखून तांकां फुडले वेंचणुकेंत कर्नाटक वगडावपाचें ना. म्हणटकच पक्षांतली धुसफूस उणी करपाक तांणी हो मुख्यमंत्री बदल केला आसतलो. शिवकुमार हांचे कडेन निधी उबारपाची, संघटणा तळागाळांत व्हरपाची कुशळटाय आसा. तातूंत पक्षाक लिंगायत, वोक्कलींग आनी ओबीसी हांचीय संतुळा सादपाची आसा. दक्षीणेंतलें काँग्रेसीच्या ताब्यांतलें हें म्हत्वाचें राज्य. आतां केरळूय मेळ्ळां. खंयचेय परिस्थितींत तांकां कर्नाटक तिगोवपाचें आसा. देखूनच हे डावपेच आसुये. सिद्धरामय्या हे गरिब परिवारांतले. तांच्या घरांत कोण राजकारणांत ना. ‘आपूण चुकूनच ह्या मळाचेर आयलों’, अशें तांणी आयज सांगलें. वकिली सोडटकच ते 1983 त पयले खेपे आमदार जाले. आतां वेंचणुके मेरेन राज्य प्रशासन आक्रमक जातलें आनी वेंचणुकेचेर लक्ष केंद्रीत करतलें अशें दिसता. मंत्रीमंडळांतूय जातीय, धर्मीक बाजू पळोवन बदल जावं येतात. कर्नाटकांतलें हें सरकार थीर दवरप हें काँग्रेसी मुखार आव्हान आसतलें. फुडल्या 48 वरां भितर कर्नाटकांतल्या ह्या नाटकाचेर पड्डो पडटलो, अशी आस्त. त्या बोवाळांत ही मुख्यमंत्र्याच्या कार्यकाळाची वांटणी काय बंड तें मात गुपीत उरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
