भांगरभूंय | प्रतिनिधी
म्हापशें: कोलवाळ मध्यवर्ती बंदखणींत मादक पदार्थ आनी मोबायल फोन तस्करी प्रकरणांत 13 कर्मचाऱ्यांक फाटल्या पांच वर्सांत निलंबीत केल्यात. जाल्यार फाटल्या एका वर्सांत कैद्यां कडल्यान 107 मोबायल फोन जप्त केल्यात.
सद्या चालू आशिल्ल्या विधानसभा अधिवेशनांत आमदार आलेक्स रेजिनाल्ड आनी आमदार क्रुझ सिल्वा हांच्या कोलवाळ बंदखणींतल्या ड्रग्स आनी मोबायल फोन तस्करी संबंदीत तारांकीत आनी अतारांकीत प्रस्नाचेर मुख्यमंत्री डॉ. प्रमोद सावंत हांणी वयली लेखी जाप दिली.
फाटल्या पांच वर्सांत म्हणल्यार एप्रील 2018 ते आतां मेरेन बंदखणींत ड्रग्स तस्करीचे पांच गुन्यांव घडल्यात. हातूंत कृष्णा उसगांवकार, उमेश सावंत, मुकेश फडते, मुकूंद गांवस हे चार जेलर, अंकूश मडकयकार आनी नाऊ पावणे हे दोन सहाय्यक जेलर तशेंच नारायण नायक, शंबू नायक, केशव गांवस, बाबू वरक, रामा कोरगांवकार, सुरज गावडे आनी समीर मोटे हे सात जेल गार्डस् मेळून 13 कर्मचाऱ्यांचेर निलंबनाची पाळी आयल्या अशें मुख्यमंत्र्यानी लेखी जापेंत म्हणलें.
हातूंतल्या 12 जाणां वयली कारवायेची प्रक्रिया सुरू आसून सहाय्यक जेलर अंकूश फडते हे सेवानिवृत्त जाले उपरांत तांकां मरण आयलें. ताका लागून तांचेर लायिल्ले सगले आरोप वगळ्ळे. जाल्यार हेरांक परतून सेवेंत आस्पावन घेतल्यात अशेंय मुख्यमंत्र्यांनी लेखी जापेंत म्हणलां.
मजगतीं, ड्रग्स तस्करीचे घडिल्ले हे प्रकार मुखार दिल्ले प्रमाण आसात. 25 ऑक्टोबर 2018 दिसा जेलगार्ड नारायण नाका हाका धरिल्लो. 13 मार्च 2019 दिसा जेलगार्ड शंबू नायक हाका धरिल्लो. 24 ऑक्टोबर 2019 दिसा बंदखण म्हानिरक्षकान धाड घालून बंदखणीची झडटी घेतिल्ली. त्या वेळार ड्रग्स आनी तंबाकूजन्य पदार्थ सांपडिल्ले.
हे कारवाये उपरांत जेलर कृष्णा उसगांवकार, उमेश सावंत, मुकेश फडते, मुकूंद गांवस, सहाय्यक जेलर अंकूश मडकयकार, नाऊ पावणे आनी जेल गार्ड केशव गांवस, बाबू वरक हांकां निलंबीत केल्ले.
उपरांत 12 सप्टेंबर 2020 दिसा गांजो तस्करी प्रकरणांत जेलगार्ड रामा कोरगांवकार हाका जाल्यार 22 जून 2020 दिसा सुरज गावडे हाका कोकेन तस्करी प्रकरणांत धरिल्लो अशें मुख्यमंत्र्यांनी लेखी जापेंत म्हणलें.
बंदखण प्रशासनान फाटल्या वर्सभरांत वेळावेळार बंदखणींत धाड घालून सगल्या विभागांची तपासणी केली. ह्या वेळार कैद्यां कडल्यान 107 मोबायल फोन जप्त केल्ले. तशेंच ह्या मोबायल तस्करी प्रकरणांत जेलगार्ड सुरज गावडे आनी समीर मोटे हांकां निलंबितूय केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
