भांगरभूंय | प्रतिनिधी
खबरां संस्था
अहमदाबादः अदूंच्या वन-डे वर्ल्ड कप सर्तींत आपली पाकिस्ताना आडची पयली मॅच थरुन न्यूझिलंडाची आडची सेमी फायनल वस्तादाच्या थाटांत जिखपी भारताचो व्हो विजय रथ साखळी फेरयेंतल्यो आपल्यो सुरवेच्यो मॅची हारपी ऑस्ट्रेलियेन आडायलो आनी 2023चे संवसारीक वन-डे क्रिकेटीचो वस्ताद जावपाचो भोवमान मेळयलो. हाचे पयलीं 1987 वर्सा ताणी भारतांत पयले फावट वस्तादपण मेळयल्लें. संवसारीक वन-डे सर्तींतले ऑस्ट्रेलियेचे हें 6वे वस्तादपण. 2011 उपरांत परत एक फावट संवसारीक वस्ताद जावपाचें भारताचें सपन मात निमाणे सपनूच उरले. 2003 उपरांत ऑस्ट्रेलियेन भारताक वर्ल्ड कप फायनलींत परत एक फावट हारयलें.
अहमदाबादच्या नरेंद्र मोदी स्टेडियमाचेर कॅप्टन रोहित शर्मा टॉस हारलो तेन्नाच भारत अर्दी लडाय हारलो. ऑस्ट्रेलियेची बॉलींग आनी ताकां जाय अशी फिल्डिंग हाका लागून आपल्या 50 ओव्हरींत भारत 240 धांवड्यो करपाक शकलो. ऑस्ट्रेलियेन 43 ओव्हरींत 4 गडी वोगडावन हें लक्ष्य हातासलें आनी भारत आनी तांच्या समर्थक लाखांनी क्रिकेट मोगींच्या खोशयेर विरजण घातलें. भारतान जे तरेन वर्ल्ड कपातले आपले कामगिरीक सुरवात केल्ली ते पळयल्यार हो पंगड हारपाक शकता अशें कोणेच चितनाशिल्लें. पूण निमाणे क्रिकेटींत कितेंय जावपाक शकता, हें परत एक फावट दिसून आयलें. मोहम्मद शामी आनी जसप्रित बुमराहान 43 धांवड्यांत ऑस्ट्रेलियेचो डेव्हीड वॉर्नर (7), मिचेल मार्श (15) आनी स्टीव स्मिथ (4) हांका आवट करून भारताच्या जैताची आस्त वाडयल्ली. पूण ट्रेव्हीस हेड मार्नुस लाबुशेनात भारतीय बॉलरांच्या यत्नांचेर उदक ओतलें आनी वीस वर्सां उपरांत वन-डे वर्ल्ड कपांत पंगडाक भारताचेरआनीक एक व्हड जैत मेळोवन दिलें. प्रतिकूल परिस्थितींत हेडान 120 बॉलांत 15 चौके आनी 3 सक्यांनी केल्ल्यो 137 धांवड्यो आनी ताका लाबुशेनांत हे वर्ल्ड कपांतलो आपलो पयलो अर्द शेंकडो (नाबाद 58) करून दिल्लो जाय तसो वांगडो हाका लागून भारता सारक्या बळीश्ट प्रतिस्पर्ध्यांक हारोवप ऑस्ट्रेलियेक शक्य जालें. भारत अदूचें वन-डे वर्ल्ड कपाचो वस्ताद जातलोच हे पळोवपाचे आशेन नरेंद्र मोदी स्टेडियमाचेर आयिल्ल्या सुमार एक लाख तीन हजार भारतीय पंगडाच्या समर्थकांचो मात सामको विरस जालो. जैताक तीन धांवड्यो जाय आशिल्ल्यो तेन्ना मोहम्मद सिराजाक जैताचो शॉट मारपाच्या यत्नांत हेडाची कॅच शुभमन गिलान घेतली. उपरांत ग्लॅन मॅक्सवेलाक घेवंन लाबुशेनान जैताचे सोपस्कार पुराय केले. ट्रॅव्हीस हेडाचें आक्रमण आनी लाबुशेनाचो संयमी खेळ हाचें दर्शन मोदी स्टेडियमाचेर घडलें. लाबु घेतशेनान 58 धांवड्यो करपाक 110 बॉल घेतले आनी ताणे फकत 4 चौके मारले.
अंदूच्यावन-डे वर्ल्ड कपात साखळे फेरयेंत ऑस्ट्रेलियेन भारत आनी दक्षीण आफ्रिके कडल्यान हार घेतल्ली. मात तांकांच सेमी फायनल आनी फायनलीत हारोवपाची जिगर तांणी दाखयली. वर्ल्ड कपांत जैताच्या लक्ष्याचो फाटलाव करतना हेडान केल्ल्यो 137 धांवड्यो सगल्यांत चड धांवड्यो आसात.
कोहली- राहुलाचे फिफ्टी
अहमदाबादच्या नरेंद्र मोदी स्टेडियमाचेर भारतीय पंगडान टॉस हारल्या उपरांत 50 ओव्हरींत 10 आवट 240 धांवड्यो केल्यो. अंदूचे वर्ल्ड कपांत भारतीय पंगड पयलेच फावट ऑल आवट जालो. भारता वतीन विराट कोहलीन 54 आनी केएल राहुलान 66 धांवड्यांची खेळी केली. कॅप्टन रोहित शर्मान 31 बॉलांत 47 धांवड्यो करून पंगडांक फास्ट सुरवात करून दिली. ही गती बाकीचे खेळगडे कायम राखपाक शकले ना. ऑस्ट्रेलिया वतीन मिचेल स्टार्कान 3 पॅट कमिंसान 2 विकेटी घेतल्यो.
निमाण्या धा ओव्हरींत ऑस्ट्रेलियन बॉलरांनी खेळाचेर वर्चस्व दवोरलें. भारताच्यो 5 विकेटी पडटगीर 42, 44 आनी 45वे ओव्हरींत भारताच्या बाकीच्यो विकेटी पडल्यो. सूर्यकुमार यादव आवट जातगीर बॉलरां सामकार भारतीय बॅट्समन चड आव्हान उबें करपाक शकले ना. विकेटी पडत गेल्ल्यान भारत व्हड थांवस्ंख्या उबारपाक शकलो ना. 48वे ओव्हरींत सूर्यकुमार (18) आवट जालो आनी निमाण्या 10 ओव्हरींत 5 विकेटी वोगडान भारतान फकत 43 धांवड्यो केल्यो.
11 तें 44 ओव्हरी मजगतीं ऑस्ट्रेलियेन खेळाचेर आपलें नियंत्रण दवोरलें. पावर प्लेंत 2 विकेटी वोगडायतगीर भारतान 11वे ओव्हरींत तिसरी विकेट वोगडायली.
विराट कोलहीन डाव साल्वाक करपाचो यत्न केलो. केएल राहुला वांगडा ताणे 109 बॉलांत 67 धांवड्यांची भागिदारी केली. रन गती वाडोवपाच्या यत्नांत कोहली आवट जाल. जडेजा तर वेळ तिगलो ना. ह्या वेळार ऑस्ट्रेलियेन पार्ट टायम बॉलर ट्रॅवीस हेड हाचे ओव्हरींचो भारतीय बॅट्समन लाब घेवपाक शकले ना. केएल राहुलान सादुरतायेन खेळून 66 धांवड्यो केल्यो. ताणे ह्या वर्ल्ड कपांतलो आपलो दुसरो अर्द शेंकडो केलो. ताचे वन-डे कारकिर्दींतलो व्हो 17वो अर्द शेंकडो. ताणे फकत एक चौको मारलो बाकीच्यो 62 धांवड्यो धांवून काडल्यो.
विराट कोहलीन सुरवेक सेगीत तीन चौके मारले. ताका पॅट कमिंसान बोल्ड केलें. 5वे ओव्हरीत बॅटिंगेक आयल्या उपरांत ताणे नेटान धांवड्यो करपाचो यत्न केलो. मात तिसरी विकेट पडल्या उपरांत ताणे पंगडाक साल्वार करपा कडेन लक्ष दिलें. अर्द शेंकडो केल्या उपरांत तो सेट जाल्लो मात 29वे ओव्हरींत कमिंसाचो शॉर्ट पीच बॉलाचेर तो बोल्ड जालो. तागेल्या बॅटीची कड घेवन बॉल विकेटींचेर गेलो. ह्या वेळार भारताच्या नांवार 148 धांवड्यो लागल्ल्यो. वर्ल्ड कपांत सगल्यांत चड 765 धांवड्यो करपी विराट कोहली पयलो खेळगडो थारलो. दुसरे सुवातेर भारताचो सचीन तेंडुलकार आसा. ताणे 2003 वर्सा 673 धांवड्यो केल्ल्यो.
कॅप्टन रोहित शर्माक पांचवे फावट अर्ध शेंकडो पुराय करपाक शकलो ना. 31 बॉलांत 47 धांवड्यो करून सको मारपाच्या यत्नांत तो कॅच आवट जालो. ताणे 4 चौके आनी 3 सके मारले. 40 ते 49 धांवड्या मदीं आवट जावपाची ताची ही पांचवी खेप आसा. अदूच्या वर्ल्ड कपांत 597 धांवड्यो करून कॅप्टन ह्या नात्यान सगल्यांत चड धांवड्यो करपी तो खेळगडो थारला. ताणे 578 धांवंड्यो करपाचो 2019 वर्सा केल्लो न्यूझिलंडाचो कॅप्टन केन विलियमसनाचो विक्रम मोडलो.
रोहित- शुभमन गिलान भारताच्या डावाची सुरवात केली. मात राहुल आक्रमक फटकेबाजी करतना शुभमन गिल मात चेंपणा खाला दिसलो. ताका चार धांवड्याचेर मिचेल स्टार्कान आवट केलो. 10वे ओव्हरींत रोहितान दोन बॉलांत 10 रन काडले, मात तिसऱ्या बॉलार व्हडलो शॉट मारपाच्या यत्नांत तो आवट जालो. भारतान 10 ओव्हरींत 80 धांवड्यो केल्यो मात 2 म्हत्वाचो विकेटी वोगडायल्यो. ऑस्ट्रेलियेची फिल्डींग बरी आशिल्ली. ताणे सुमार वीस तरी धांवड्यो वाटायल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.