भांगरभूंय | प्रतिनिधी
भांगरभूंय । प्रतिनिधी
कोरगांवः पेडणे तालुक्यांतल्या वझरी गांवांतली वझरीच्या ग्रामस्थांच्या ताब्यांत आशिल्ली जमीन शेतकारांक विस्वासांत घेनासतना स्वताक भाटकार म्हणपी एके व्यक्तीन परस्पर विकपाचो प्रकार जाला. तातूंत राज्य मंत्रिमंडळांतलो एक मंत्री आनी आमदार वांटेकार आसा. थळाव्या पंचायत मंडळाचेर दाखलो दिवपा खातीर चेंपण हाडटात. देखून वझरी शेतकार नागरी कृती समितीची ताकतिकेची बसका सातेरी मंदीर सभाघऱांत जाली.
बसकेक समितीचो अध्यक्ष नीलेश नायक, उपाध्यक्ष संजय देविदास, सचीव संतोष राऊळ, महादेव नायक, दशरथ कळंगुटकार, दत्ताराम शेट्ये, कृष्णा नायक हाजीर आशिल्ले. 69/0 सर्वे नंबरांतली जमीन चारुशीला दत्तराज देसाय हिणे एक मंत्र्याक परस्पर विकल्या. तिचे सरभोंवतणी वय घालपा खातीर थळावे पंचायतींत अर्ज केल्या उपरांत ही गजाल उक्ताडार आयली. आमदार प्रवीण आर्लेकार आनी पंचायतीचो हातूंत आसपाव आसा अशें नीलेश नायकान बसकेंत सांगलें.
बसकेंत पंचायत, सरपंच आनी पंच वांगडी चोर आसात अशें सांगल्या उपरांत वादावादी जाली आनी प्रकरण हातघाईचेर येवपाची परिस्थिती उप्रासली. सरपंच अनिल शेट्ये आनी पंच वांगडी संजना परब हांणी नीलेश शेट्ये हाका आव्हान दिलें. निमाणे अॅड नारायण कळंगुटकारान मध्यस्ती केली. वझरी गांवा कडेन संबंद आशिल्लो रिव्होल्युशनरी गोवन्साचो फुडारी मनोज परब हाणे पोर्तुगिजांची नामोनिशाणी दवोरचो अशें सांगपी मुख्यमंत्री डॉ प्रमोद सावंत हाणे वझरींत कोर्ट रिसिव्हर कित्याक दवोरला असो प्रश्न केलो.
वझरीच्या शेतकारांच्या हिताची राखण करपा खातीर एकवटीत जावपाक जाय अशें सागून अॅड कळंगुटकारान लोकाक कायद्याची बाजू समजावन सांगली आनी कसले आडमेळे आसात हाची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
