वजन उणें करप काय चरबी ? हातूंत फरक कितें ?

भांगरभूंय | प्रतिनिधी

आयचे व्यस्त जिणेंत फिट रावप खूब म्हत्वाचें. चडशे लोक जिमांत वचून आपली शारिरीक भलायकी सांबाळपा खातीर वर्कआउट करतात. कांय जाण घरांत व्यायाम करतात. फिटनेसाची जाणविकाय आशिल्ले जायतें जाण वजन उणें करप आनी चरबी उणी करप अशा दोन गजालीं मदीं गोंदळतात. वजन उणें करप आनी चरबी उणी करप हें एकूच न्हय तर दोन वेगवेगळीं संकल्पना जावन आसा. दोगांय मदलो फरक समजून घेवप गरजेचें. व्यायामाची गजाल येता तेन्ना सगळेच एक ध्येय मतींत घेवन वर्कआउट करतात, वजन उणें करप आनी चरबी उणी करप हांचे मदलो फरक जाणून घेतल्यार तुमकां तुमचीं ध्येयां साध्य करपाक मजत करूंक शकता.
कुडीचें वजन उणें जाल्ल्यान वजन उणें जावप अशें म्हण्टात. हे प्रक्रियेंत कुडीची चरबी, स्नायू, उदक आनी हेर कांय घटकांचो आस्पाव जाता. वजन मेजपा खातीर एक विशिश्ट तागडी वापरतात. आहारांत, द्रवाची पातळी आनी वर्कआउट नित्यनेमांत बदल जाल्यार वजन वाडूंक वा उणें जावंक शकता. ह्या गजालीं कडेन लक्ष दिल्यार वजन उणें करप शक्य जाता.
कुडींतली चड चरबी उणी केल्यार चरबी उणी करप, अशें म्हण्टात. हे प्रक्रियेंत कुडीच्या एका विशिश्ट भागांतली चरबी उणी करपाचे यत्न करतात. चड चरबी आसल्यार गोडेंमूत, काळजाचे दुयेंस, रगतपेशींचे दुयेंस जावपाचो धोको वाडटा. हे दुयेंस जावचे न्हय म्हूण चरबी उणी करपाचे यत्न करतात. हाचे भायर कुडीची चरबी
उणी करप बॉडी बिल्डिंग खातीर गरजेचें
आसता.
वजन उणें करपा परस चरबी उणी करप कुडीक चड फायदेशीर अशें जायत्या जाणांचें मत. चरबी उणी जाल्ल्यान स्नायू घट जातात. तशेंच पचन क्रियेची गती वाडटा. शारिरीक कार्यक्षमताय वाडपाक मजत करता. चरबी उणी जाल्ल्यान कुडीच्या आकारांत येवपाक मजत जाता. चड चरबी उणी केल्यार भलायकी सुदारता. काळजाचे दुयेंस, गोडेंमूत ह्या सारक्या जायत्या गंभीर दुयेंसांचेर मात करप शक्य जाता.
एकदां वजन उणें जालें म्हणटकच कांय दिसांनी परतून वजन वाडपाची शक्यताय आसता. चरबी उणी करपाचेर लक्ष केंद्रीत केल्यार दीर्घकालीन परिणाम मेळटा. हाका लागून कुडीचो टोन जाता. ताका लागून आत्मविस्वास आपोआप
वाडटा.