ल्हान सान गजालींतल्यान जिणेशैली सुदारया

भांगरभूंय | प्रतिनिधी

भलायकी ही सगळ्यांत व्हडली संपत्ती. बसून रावपाची, शारिरीक व्यायाम नाशिल्ली सुस्त जिणेशैली हो एक म्हत्वाचो भौशीक भलायकेचो प्रस्न जावपाक लागला. सुस्त जिणे पद्दत जायत्या राश्ट्रांनी दीर्घकालीन भलायकेच्या परिस्थिती कडेन संबंदीत आसून लेगीत ती चड प्रमाणांत पातळ्ळ्या, अशें दिसता. बर्‍याच काळा सावन बसून वा पडून रावप, व्यायाम सामको उणो वा कसलोच व्यायाम करिनासतना रावपाची पद्दत म्हळ्यार सिडेंट्री वा सुस्त जिणे पद्दत. संवसारीक भलायकी संघटनेच्या (डब्ल्यूएचओ) मतान हे सुस्त जिणे पद्दतीन व्यक्तीचे भलायकेचेर गंभीर परिणाम जावंक शकतात. मरण आनी अपंगत्व हांच्या 10 मुखेल कारणां मदीं तो आसूं येता.
सुस्त जिणेशैलीक लागून सकयल दिल्ले प्रस्न उप्रासपाक शकतातः
लठ्ठपणां, टायप 2 गोडेंमूत, कॅन्सराचे प्रकार
हृदयविकाराचें दुयेंस, बेगीन मरण येवप, पित्त फातराची समस्या
संधिवात हो रोग, कोलेस्टरॉल वाडप आनी हेर असंख्य समस्या.
भारतांत बायलां मदीं पीसीओएस, फायब्रोयड, एन्डोमेट्रियोसिस, होर्मोनल असंतुलन, मेनोरेजिया, रजोनिवृत्तीक (मेनोपोज) पावतकच वेगवेगळे भलायकेचे प्रस्न, लठ्ठपणां, इन्सुलिन प्रतिकार, गोडेंमूत आदीं आनी खासा करून मानसीक भलायकेच्या समस्यांनी खूब वाड जाल्या.
उणी वा कसलीच शारिरीक क्रियाशीलताय नाशिल्ले कारणान एक अशे तरेची जिणे पद्दती निर्माण जाल्या जाका लागून हाडांचें द्रव्यमान उणें जाता, खनिजांची घनताय उणी जाता. देखून खास करून बायलांक ओस्थियोपोरोसिस तशेंच संधिवात जाता.
ह्या समस्यांक लागून चलप कठीण जाता आनी जर योग्य आहार संवय पाळ्ळी ना जाल्यार मागीर ताका लागून वजन वाडटा आनी तें वेळार नियंत्रीत करूंक ना जाल्यार लठ्ठपणां येता. ह्या लठ्ठपणाक लागून शरिराचें वजन घेवपी सांध्यांक लुकसाण जाता जें संधिवात आनीक वाडयता.
सुस्त जिणेशैली आपणायिल्ले कारणान रजोनिवृत्ती (मेनोपोज) कडेन वचपी बायलांक खूब मूड स्विंग्स अणभवचे पडटात. तिका उच्च रक्तदाब आनी गोडेंमुताचें निदान जाता, मासिक पाळये वेळार चड रगत व्हांवप (मेनोरेजिया) आदी समस्यांक तोंड दिवचें पडटा. जर ती निरोगी जिणे पद्दत पाळटा आसत जाल्यार ह्या लक्षणांची तीव्रता सामकी उणी जाता.
तरणाट्या चलयां मदीं नव्या पिरायेची म्हामारी म्हळ्यार पीसीओएस. शारिरीक निश्क्रीयताय वा उण्यांत उणी क्रियाशीलताय हाचे वांगडाच अनियमीत खावपाची संवय आनी ताण, इन्सुलिन प्रतिकार करपाक कारण जाता आनी तातूंतल्यान पिसीओएसाक वाट फुट्टा. हें 18 ते 35 वर्सांच्या तरणाट्या चलयां मदीं दिसता. 10 मदल्या कमीत कमी 8 बायलांक पीसीओएस जाता. सप्टेंबराक पीसीओएस जागृताय म्हयनो म्हूण मान्यताय मेळ्ळ्या. पीसीओएसाची लक्षणां म्हळ्यार अनियमीत पीरियड, वजन वाडप, गळ्या भोंवतणीं तशेंच हातांचेर एक तरेचें काळपटपण येवप, नाका थंय केंस वाडप (hirsutism), पुरळां येवप, केंस वचप आदी.
हालींसाराक बायलो चड करून थायरॉयड समस्या खास करून हायपोथायरायडीझम आनी हायपर थायरॉयड, फायब्रोयड, आनी हेर जायत्या भलायकेच्या दुयेंसांनी ग्रस्त दिसतात.
सद्याची पिळगी ज्या सगळ्या परिस्थितींतल्यान वता तातूंतले त्रास आडावपा खातीर कांय साद्यो गजाली करप शक्य आसाः

1. दिसाक 30 मिणटां (सप्तकांत 150 मिणटां) व्यायाम करचो. एका वेगान चलप, जॉगींग करप, धांवप, जिमांत वचप, नाचप, झुंबा क्लासीक वचप, योगा करप आदीं करूं येता.
2. पि.सी.ओ.एस आनी थायरॉयड समस्या आशिल्ल्या बायलांनी उण्या ते मध्यम तीव्रतेच्या व्यायामाचो पर्याय घेवचो. कारण तो चरबी जळोवपाक मदत करता.
3. सप्तकांत दोन फावटीं प्रशिक्षीत आनी प्रमाणीत फिटनेस प्रशिक्षका खाला स्वताच्या व्यायामाची क्षमताय वाडयात. वजन उखलप बायलांक उपेगी पडटा. स्नायूंचे क्रॅम्प कमी करपाक, तुमचें स्नायुबंध आनी सांधे घट करपाक, सांध्यांच्यो चडश्यो समस्या पयस दवरपाक, तुमचे स्नायू घट करपाक आनी तुमकां भलायकेन बरे स्नायू तयार करपाक मदत जाता.
4. थळावें जेवप. तुमचो आहार तुमी खंयच्या राज्यांत रावतात, तुमी खंय रावतात आनी हंगामा प्रमाण आसूंक जाय.
5. रागी, ज्वारी, बाजरी आदी जटिल कार्बोहायड्रेटांचो आस्पाव जेवणांत करप.
6. बारीक कमर जाय आसत जाल्यार एक मुठी तांदूळ पुरो.
7. घरांत तयार केल्लें तूप बरी कात, भलायकी, आंतकड्यांची हालचाल आनी बरे केंस हांचे खातीर म्हत्वाचें.
8. 7- 8 वरां न्हीदप.
9. दर दिसा 2- 3 लिटर उदक पिवप.
10. मैदो, बेकरी उत्पादनां वा प्रक्रिया केल्लें अन्न, चड साकर आनी मीठ टाळचें.
11. मीठ आनी साकर उणी करपाचो यत्न करात.
12. तुमच्या ओव्हर पॅक केल्ल्या वेळापत्रकांतल्यान अदी मदीं विसव घेयात. ह्यो ल्हान सान जिणे कडेन जोडिल्ल्यो गजाली तुमची भलायकी सुदारपाक आनी रोगां पासून तुमकां पयस दवरपाक खूब उपेगी थारपाक शकता.

डॉ. प्रतिष्ठा कुंकळकार
7798301794