भांगरभूंय | प्रतिनिधी
काणकोण, प्रतिनिधी: लोलयेंच्या केशव देवूळ आनी दामोदर देवळाचीं दारां मोडून चोरान केशव देवळांत आशिल्ल्या विवीध ५ देवतांच्यो फंड पेटयो फोडल्यो. चोरांनी ह्या फंडपेयांतल्यान सुमार १५ हजार रूपया चोरिल्ल्याचो अदमास आसा. जाल्यार केशव देवळा पसून कांय अंतराचेर आशिल्ल्या दामोदर देवळांतूय चोरांनी प्रवेश करून भक्तांनी भटजीक दिल्ली आनी भटजीन देवळांतूच दवरिल्ली गुरुदक्षिणा चोरली.
चोरयेची म्हायती देवळाच्या पदाधिकार्यांनी काणकोण पुलिसांक दिले उपरांत काणकोण पुलिसांचो एक पंगड पुलीस निरीक्षक हरीश राउत देसाय हांच्या मार्गदर्शना खाला घडणुके सुवातेर पावलो. तांणी सुण्यांचो पंगड आनी फोरेन्सीक तज्ञांक आपयल्यात. फोरेन्सीक तज्ञांची गाडी घडणुके सुवातेर पावल्या. मात सुण्यांचो पंगड पावूंक नाशिल्लो. हो चोर देवळांतले सी.सी.टीव्ही फुटेजींत दिसता. हे फुटेजीक लागून चोरांक धरपाक काणकोण पुलिसांक येस मेळपाची शक्यताय आसा.
सी.सी.टिव्ही फुटेजींत दिसपी चोर आयतारा दनपरां रस्त्यान चलत लोलयें वाठारांत भोंवतालो. उपरांत रातच्या सुमार १०.१७ वरांचेर तांणी चोरी केल्ल्याचें सी.सी.टिव्ही फुटेजींत दिसता. अशी म्हायती केशव देवस्थानाचे अध्यक्ष प्रदीप माळीयार, दामोदर देवालयाचे संदेश प्रभु शेळीकार आनी संतोष प्रभु शेळीकार हांणी दिली.
फोरेन्सीक तज्ञानी आनी सुण्यांच्या पंगडा वरवीं तपासणी जावंक नाशिल्ल्यान आनी तपासणे बगर देवळांत प्रवेश करपाक मेळनाशिल्ल्यान नेमकें कितें चोरून व्हेलां हाचो अदमास येना, अशें संतोष प्रभु शेळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
