भांगरभूंय | प्रतिनिधी
पणजी: कला आनी संस्कृती संचालनालय, पश्चीम विभाग सांस्कृतीक केंद्र, उदयपूर हांच्या जोड पालवान दर्या संगम, कला अकादमी, कांपालार १७ ते २६ जानेवारी मेरेन वर्सुकी राष्ट्रीय लोकोत्सव २०२५ चें आयोजन करतले.
विंगड विंगड राज्यांतले ५०० कलाकार ह्या महोत्सवांत वांटो घेवन आपल्या राज्यांतलो लोकनाच, लोकसंगीत आनी हेर कला सादर करतले. लोकोत्सवाच्या काळांत गोंयां सयत विवीध राज्यांतले मेळून ८०० परस चड कारागीर हस्तकला वस्तूंचे आनी खाद्य पदार्थ प्रदर्शन, तशेंच विक्री करपाचे स्टॉल्स घालतले.
लोकोत्सवांत आपलो स्टॉल घालपा खातीर कार्ड/ परवानो आशिल्लें हस्तकला, हातमाग, परंपरीक भांगरां आनी हेर उत्पादनां तयार करपी गोंयांतले हस्तकला कारागीर आनी खावपा जिन्नस उत्पादन आनी विक्री करपी व्यक्तीं कडल्यान विहीत नमुन्यांत अर्ज मागयल्यात.
सगळ्या स्टॉलां खातीर शुल्क लागू आसतलें. हस्तकला आनी पॅक्ड फुडाचे स्टॉल शॅरिंग तत्त्वाचेरय आसतले (दोन मनशां खातीर) आनी ते प्रमाण शुल्क वांटून घेवपाक मेळटले. शुल्क डेबिट कार्डा वरवीं स्टॉल वाटपा वेळार भरचें पडटलें. अर्ज १० रूपया फारीक करून कला आनी संस्कृती संचालनालय, संस्कृती भवन, पाटो पणजी हांगा १८ डिसेंबर मेरेन ‘पयलीं येवप्यांक पयली’ ह्या तत्त्वाचेर सकाळीं १० ते सांजेच्या ५ वरां मेरेन मेळटले. भरिल्ले अर्ज २० डिसेंबर मेरेन खात्याच्या कार्यालयांत दिवपाक जाय. हे अर्ज फकत गोंयच्या हस्तकला कारागीर, पॅक केल्ले खावपाच्या जिन्नस स्टॉलां खातीर आसात. वळखपत्र तपासून एका विक्रेत्याक फकत एकूच अर्ज दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
