भांगरभूंय | प्रतिनिधी
झिम्बाब्वेचे भोंवडेर वचपी भारताच्या पंगडाचें फुडारपण लोकेश राहुल करतलो. ही भोंवडी 18 ऑगस्टा पसून सुरू जातली. हे भोंवडेर भारताचो दुसऱ्या दर्जाचो पंगड वतलो. आदीं हे भोंवडेर दावखुरो ओपनर शिखर धवन पंगडाचें फुडारपण करपाचो आशिल्लो. पूण, भोंवडेक कांय दीस बाकी आसतना निवड समितीन आपलो निर्णय बदलून राहुलाक मुखेलपद दिलें. जाल्यार शिखर धवन उप मुखेली आसतलो.
लोकेश राहुलाचेर कांय म्हयन्यां पयलीं ऑपरेशन केल्लें. ताका लागून तो हे भोंवडे खातीर भारताच्या पंगडाचो वांगडी नाशिल्लो. पूण, आतां तो पुर्ण तंदुरुस्त जाला आनी ताका लागून ताचो पंगडांत आस्पाव करपा खेरीत मुखेलपद लेगीत दिलां.
झिम्बाब्वेचे भोंवडेर भारत तीन वन डे मॅची खेळटलो. पयलीं मॅच 18 ऑगस्टाक जातली. जाल्यार दुसरे मॅच 20 ऑगस्टाक आनी तिसरी मॅच 22 ऑगस्टाक जातली. माळेंतल्यो सगल्यो मॅची हरारे क्रिकेट मैदानाचेर जातल्यो. मॅची भारतीय वेळा प्रमाण दनपारच्या 12.45 वरांचेर सुरू जातल्यो.
जखमी वॉशिंग्टन सुंदरा विशीं दुबाव
मजगतीं, वॉशिंग्टन सुंदराचो झिम्बाब्वे भोंवडेर वचपा विशीं दुबाव उप्रासला. सुंदराक ही दुखापत कावंटी क्रिकेट सर्तींत खेळटना जाल्या. ताची ही दुखापत कितली गंभीर आसा हें अजून स्पश्ट जावंक ना.
फाटल्या दोन वर्सां पसून सुंदर दुखापती कडेन झुजता. हालींच ताणें कावंटी क्रिकेट सर्ती वरवीं क्रिकेट मैदानाचेर पुनरागमन केल्लें. कावंटींत पदार्पणाचे मॅचींत ताणें पांचा परस चड विकेटी घेतल्यात. तशेंच बॅटान लेगीत ताणें जबरदस्त प्रदर्शन केलां.
पंगडः लोकेश राहुल (मुखेली), शिखर धवन (उप मुखेली), ऋतुराज गायकवाड, शुभमन गिल, दीपक हुड्डा, राहुल त्रिपाठी, ईशान किशन (विकेटकीपर), संजू सॅमसन (विकेटकीपर), वॉशिंग्टन सुंदर, शार्दुल ठाकूर, कुलदीप यादव, अक्षर पटेल, आवेश खान, प्रसिद्ध कृष्णा, मोहम्मद सिराज, दीपक चाहर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
