भांगरभूंय | प्रतिनिधी
कॅ. विरियातो हांणी लोकसभा वेंचणुके खातीर भरलो अर्ज
मडगांव, प्रतिनिधी : राज्यांतलीं रानां, न्हंयो, दर्यादेग वाठार राखपा खातीर शेतजमनी आनी पर्यावरण राखपा खातीर कॅ. विरियातो फुडें सरून लेगीत तांचेर सरकारान गुन्यांव नोंद केला. वेंचणूक आयोगाच्या निर्देशां प्रमाण तांचे वयलो गुन्यांव भौशीक केला आनी ही जायरात पळोवन दक्षीण गोंयच्या लोकांक हाचो अभिमान आसतलो. कारण हो गुन्यांव तांणी लोकां खातीर आपल्या आंगार घेतला. म्हणून दक्षीण गोंयचे लोक तांचे वांगडा रावतले, अशें कॉंग्रेस प्रदेशाध्यक्ष अमित पाटकार हांणी सांगलें.
लोकसभा वेंचणुकेंतले दक्षीण गोंयचे कॉंग्रेस उमेदवार कॅ. विरियातो फर्नांडीस हांणी रामनमी दिसा निमतान दक्षीण गोंय जिल्होधिकारी तशेंच जिल्हो वेंचणूक अधिकारी अश्विन चंद्रू ए. हांचे कडेन उमेदवारी अर्ज सादर केलो. ह्या वेळार विरोधी पक्ष फुडारी युरी आलेमांव, गोवा फॉरवर्ड अध्यक्ष विजय सरदेसाय, आमदार कॅ. व्हेंझी व्हिएगस हाजीर आशिल्ले.
अर्ज सादर करचे पयलीं कॅ. विरियातो हांणी फातोर्डेंच्या दामोदर देवस्थानांत आनी कपेलांत वचून आशिर्वाद घेतले. उपरांत कॉंग्रेस कार्यालया लागसारा कॉंग्रेसी सयत इंडी आघाडीचे फुडारी कार्यकर्त्यां कडेन उलयले. अमित पाटकार हांणी, राज्यांतल्या रेल्वे दोट्टी करणाक विरोध करपाक लढटना हो खटलो तांचे आड आशिल्ल्यान, हाचो आमकां अभिमान आसा. गोंय राखपा खातीर झगडपी कॅ. विरियातो हांचेर राज्य सरकारान खटलो दाखल केला. लोकां खातीर झगडपी उमेदवार आघाडीन दिला हाचो अभिमान आसा. अशें पाटकार हांणी म्हणलें.
रामनमी दिसा आघाडीचे दोनूय उमेदवार उमेदवारी अर्ज सादर करतले. सरकारान रामराज्य हाडचे बदला राज्यांत रावणराज्य हाडलां. गोंय सांबाळपा खातीर राज्यांतलें कॉंग्रेस, गोवा ङ्गॉरवर्ड, शिवसेना, आप, तृणमूल कॉंग्रेस आनी राष्ट्रवादी कॉंग्रेस अशे सगळे पक्ष एकठांय आयल्यात. आमकां इव्हेंट मॅनेजमेंट वा पयशे चड खर्च करपाक मेळचे ना. मात आमकां लोकांचो तेंको आसा. ही वेंचणूक मनी पॉवरा आड पिपल्स पॉवर अशी आसा. हो जोश असोच कायमचो रावतलो अशें युरी आलेमांव हांणी सांगलें.
बेरोजगारी ही देशांत सगळ्यांत चड आसा. पल्लवी धेंपो हांणीय लोकांनी बेरोजगारी, बायलां सक्षमीकरणा विशीं प्रस्न केल्ल्याचें सांगून राज्य सरकार नोकर्यो दिवपाक अपेशी थारिल्ल्याचें स्पश्ट केलां. राज्य सरकार नोकर्यो विकिल्ल्यान थळाव्यांक रोजगार मेळना. लोकांचें जगणें बरें करपा खातीर, पर्यावरण, गोंय राखपाक झगडपी उमेदवाराच्या फाटल्यान रामाचे आसतले आनी लोकांनीय तांकां फाटबळ दिवचें, असो उलो विजय सरदेसाय हांणी मारलो. ते ड्युप्लिकेट रामभक्त जाल्यार आमी ओरिजिनल रामभक्त आशिल्ल्यान आतां रामनवमी दिसा उमेदवारी अर्ज सादर करतात.
भाजपा वांगडा भोंवपी कार्यकर्त्यांकूय सिलिंडर, वाडिल्ल्या पेट्रोलाचो विशय सतायता. उदकाचीं, लायटीचीं बिलां तींय चड दिसतात. राज्यांतले सगळे पक्ष एक जाल्ल्यान भाजपा भियेलां. ताका लागून खुबशे राष्ट्रीय फुडारी गोंयांत येतात. लोकांनी भाजपाच्या धमक्यांक भियेवपाची गरज ना, मतदानांतल्यान जनशक्तीची तांक दाखयात.
सामान्यांची लढाय दिल्ली मेरेन: कॅ. विरियातो
सरकार गोंय सांबाळपाक झगडपी कार्यकर्ते, संस्था, लोकांचेर गुन्यांव नोंद करता, मायनींग बंद करतना खुबश्या जाणांक उक्ताडार सोडले, शेतकारांक फटयले, तरणाट्यांक रोजगार ना, बायलांचेर अत्त्याचार जातात. ही उमेदवारी फकत म्हजी न्हय, जाल्यार सरकाराक लागून त्रासांत सांपडिल्ल्या सगळ्या सामान्य लोकांची जावन आसा. ही लढाय गोंयच्या दिल्ली मेरेन व्हरतले, अशें मत कॅ. विरियातो हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
