भांगरभूंय | प्रतिनिधी
मडगांव : लोकशायेंत सगळ्यांक उलोवपाचो अधिकार आसा. आमी तो अधिकार कोणा कडल्यान काडून घेवपाक शकना. खंयसरूय कितेंय चुकल्यार तें दाखोवपाचोय अधिकार आसा. जी समस्या मुखार आसा ती सोडयतले. लोकांच्या बर्या खातीरचे केल्ले टिकेक येवकार आसा, अशें आमदार दिगंबर कामत हांणी मडगांवां एके कार्यावळी उपरांत प्रसारमाध्यमां कडेन उलयतना सांगलें.
आमदार कामत हांकां मडगांवां तांच्या कामावेल्यान जावपी टिकेचेर प्रस्न केलो तेन्ना तांणी, लोकशायेंत सगळ्यांक व्यक्त जावपाचो अधिकार आसा. ती टिका लोकांच्या बर्या खातीर आसतली आनी हाका लागून कामां मदीं सुदारणा करतले. सुधारणा करपाक हें गरजेचें थारतलें आनी लोकांकूय सुविधा मेळटल्यो. हातूंत आपल्याक कसलीच आडखळ ना, अशें कामत हांणी स्पश्ट केलें.
मडगांव पालिकेंत पुराय वेळा खातीर मुख्याधिकार्यांची गरज आशिल्ली. पत्रकारूच मुख्याधिकारी केन्ना मेळटलो असो प्रस्न विचारताले. आतां मडगांव पालिकेंत मेलविन वाझ हांची पुराय वेळ मुख्याधिकारी म्हणून नियुक्ती केल्या. मडगांव पालिकेचें कामकाज आनी ज्यो समस्या आसात त्यो समजून घेवपा खातीर कांय वेळ घेयात. सोनसडो यार्डांत कोयराची समस्या आसल्यार वा आनीक कितेंय समस्या आसल्यार थंय भेट दिवची. उपरांतूच कामांचें म्हत्व थारोवचें आनी उपरांत हाची म्हायती सगळ्यांक दिवची, अशें आपणें मुख्याधिकारी मेलविन वाझ हांकां सांगिल्ल्याचें कामत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
