भांगरभूंय | प्रतिनिधी
सावियो कुतिन्होः हुस्को उक्तावन राहूल गांधी हांकां ईमेल
भांगरभूंय । प्रतिनिधी
मडगांवः लोकसभेच्या दोनूय मतदारसंघां खातीर उमेदवार जाहीर करपाक काँग्रेसी वतीन कळाव जाता. हाचेर हुस्को उक्तावन काँग्रेस फुडारी सावियो कुतिन्हो हांणी थेट राष्ट्रीय फुडारी राहूल गांधी हांकां ईमेल केल्या.
लोकांक मेळटना, उमेदवारांचे घोशणेक कळाव जावपा फाटलीं वेगवेगळीं कारणां सांगतना तणाव येता. दक्षीण गोंय मतदारसंघ पक्षा खातीर निश्चीत आव्हानात्मक थारतलो, हें पक्ष नेतृत्वान लक्षांत घेवप खुबूच गरजेचें आसा. प्रतिस्पर्धी उमेदवार उद्देजक पल्लवी धेंपे ही उद्देजक परावारांतली आशिल्ल्यान, काँग्रेसीचे उमेदवार जाहीर करपाक आनीक कळाव केलो जाल्यार प्रचारांतल्यो समस्या वाडटल्यो. प्रतिस्पर्धी उमेदवाराक व्हड प्रमाणार अर्थीक फाटबळ मेळटा, ताका लागून उमेदवार थारावपा खातीर वेडकाडूपणा धोरण मारक थारूं येता, अशें कुतिन्हो हांणी म्हणलां. काँग्रेस कार्यकर्त्यांक आनी समर्थकांक पक्षाक तेंको दिवचे खातीर भाजपा कडल्यान कितेंय करपाक शकतात. पक्षा भितर निर्णय घेवप्यांनी हें समजून घेवपाक जाय, भाजपा कडेन सत्ता, प्रभावसाली फुडारी आनी पयशांची शक्ती अशे वेंचणूक लडोवपा खातीर म्हत्वाचे घटक आसात. पूण काँग्रेस, भारत आघाडीक सध्या सामान्य लोकांचो घटमूट तेंको आसा, जांकां भाजपाक घरा धाडपाचो आसा. मात लोकांक गृहीत धरून, तांचे कडल्यान जापसालदारकेची गजाल म्हूण पक्षाक तेंको दिवपाची अपेक्षा धरप, हें निश्चितूच योग्य ना. नेतृत्वां मदल्या झगड्यांक लागून कळाव जाता, अशें लोकां मदीं पातळटा. ताका लागून पक्षा विशींची लोकां मदलीं सहानुभुती उणी जाता. हे आदीं पक्षांतरांक लागून पक्षाचें व्हड प्रमाणांत लुकसाण जालां. लोक अजून काँग्रेसीक तेंको दिवचे खातीर परतून येवपाक तयार आसा, पूण तांकां पयस करतात, अशें सध्या चित्र आसा. हे वेंचणुकेंत दक्षीण गोंयांतली काँग्रेसी कडेन आशिल्ली सुवात भाजपाक दिली जाल्यार लोक केन्नाच माफ करचे नात. ते खातीर कळाव करिनासतना उमेदवारांच्या नांवांची घोशणा करची, अशी मागणी सावियो कुतिन्हो हांणी राहूल गांधी हांचे कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
