भांगरभूंय | प्रतिनिधी
पणजी : येता ते लोकसभा वेंचणुकेंत उण्यांत उणें राज्यातले 8 हजार मतदार टपालांतल्यान मतदान करतले. वेंचणूक आयोगाच्या गोपां कडल्यान ही म्हायती मेळ्ळी. लोकसभा वेंचणूक आतां लागीं पावल्या. वेंचणुकेंत काम करपी अधिकारी, पुलीस आनी आपत्कालीन अधिकारी हांकां टपालांतल्यान (पोस्टल बॅलट) मतदान करपाची मेकळीक ह्या वेळार लेगीत आसतली.
वेंचणूक ड्युटेर आसपी सरकारी अधिकारी आनी कर्मचाऱ्यांक पोस्टल बॅलेट मतदानाची सुविधा आसता. तशेंच आपत्कालीन सेवा दिवपी (पुलीस, उजो पालोपी दळाचे कर्मचारी, दोतोर) कर्मचाऱ्यांक पोस्टल बॅलेट सुविधा उपलब्ध आसता. हे सगले कर्मचारी वेंचणुके पयलीं प्रशिक्षण घेतले. प्रशिक्षण सुरू आसतना दोन दीस पयलीं तांकां मतदान करचें पडटलें. मतपत्रिका घरा व्हरपाक मेळच्यो नात.
दिव्यांग आनी 80 वर्सां पिराये वेल्या मतदारांक पोस्टल बॅलेटाची सुविधा आसा. कितले जाण हाचो लाव घेतले, हाचो आंकडो आतांच सांगपाक जावचो ना. वेंचणुकेची तारीख जाहीर जाले उपरांत दिव्यांग आनी 80 वर्सां पिराये वेल्या मतदारांनी वेंचणूक आयोगाक कळोवचें पडटलें. हाका लागून टपालाच्या आदारान मतदान करतल्यांचो आंकडो वाडपाची शक्यता आसा. मतदाना पयलीं तीन दिसां भितर वेंचणूक आयोगाचे कर्मचारी संबंदीत मतदारांच्या घरा मतपत्रिका घेवन येतले. मतदान केले उपरांत सीलबंद मतपत्रिका ते घेवन वतले. मतदार वळेरेंत दिव्यांग अशी नोंद आसची पडटा. जांची नोंद ना, तांकां पोस्टल बॅलेट सुविधा मेळची ना. अंदूंचे लोकसभा वेंचणुकेंत पोस्टल बॅलेट नेमाची खरपणान कार्यवाही जातली.
लोकसभा वेंचणुके खातीर कर्मचाऱ्यांक प्रशिक्षण दिवपा सयत तयारीच्या बसकांक सुरवात जाल्या. इलेक्ट्रॉनीक मतदान यंत्रांची (एफएलसी) पयल्या पांवड्यार तपासणी जाल्या, अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
