भांगरभूंय | प्रतिनिधी
उत्तरेंतल्यान आरजीपीचो उमेदवारी अर्ज दाखल, म्हादयवेल्यान कॉंग्रेस- भाजपाचेर फोग
पणजी, प्रतिनिधी: गोंयकार राष्ट्रीय पक्षांक सामकेच विटल्यात. हे फावट रेव्ह्युलेशनरी गोवन्स पक्ष उत्तर आनी दक्षिणेंत दोन गोल मारून जैतिवंत जातलो, असो विस्वास उत्तर गोंयचे आरजीचे उमेदवार मनोज परब हांणी अर्ज भरले उपरांत उक्तायलो. मनोज उर्फ तुकाराम परब हांणी समर्थकांचें शक्तिप्रदर्शन दाखयत उत्तर गोंय जिल्होधिकारी कचेरेंत अर्ज भरलो. उत्तर गोंय जिल्होधिकारी स्नेहा गिते हांणी अर्ज स्विकारलो. अर्ज भरतना सांत आंद्रेचे आमदार विरेश बोरकार आनी हेर पदाधिकारी हजर आशिल्ले.
मनोज आनी कार्यकर्त्यांनी आझाद मैदानाचेर विरांक नमन करून उत्तर गोंय जिल्होधिकारी कचेरी मेरेन रोमट वाजयत रॅली काडली. मात पुलिसांनी तांकां रस्त्या भायरूच आडयले. मनोज आनी हेर पदाधिकार्यांक सोडून कोणाकूच कचेरीचे सुवातेंत येवपाक दिवंक ना. मात काल आनी पयर कॉंग्रेस आनी भाजपाच्या कार्यकर्त्यांक कचेरीचे सुवाते भितर येवपाक मेकळीक दिली, अशें आरजी वावुरप्यांनी सांगलें.
अर्ज भरले उपरांत मनोज हांणी इंडी आघाडी आनी भाजपाचेर म्हादयच्या विशया वेल्यान फार पेटोवप चालूच दवरलें. भाजप आनी कॉंग्रेस लोकशाय वाटोवपाचे उलयतात तांणी पयलीं म्हादय वाटोवची. म्हादय वाटोंवक ना जाल्यार लोकशाय खंयची उरतली, असो प्रश्न मनोज हांणी केलो. म्हादय उरुंकना जाल्यार गोंयचें अस्तित्व, गोंयची संस्कृताय नश्ट जातली. ते भायर तुमच्यो नोकर्यो आनी कोळश्याचो हबय उरपाक ना. जे मेरेन म्हादयचे श्वेतपत्र तुमी पल्या जाहीरनाम्यांत घालचे नात तो मेरेन लोक ह्या पक्षांचेर विश्वास दवरचे नात, अशी प्रतिक्रीया मनोज हांणी उक्तायली.
इंडी आघाडींक म्हादयचो विशय राष्ट्रीय जाहीरनाम्यांत घालपाक कसलीच आडखळ जावची नासली. गोंयांत फकत २ सीट आसात आनी कर्नाटकांतले २८ सीट कशेय तरेन जिखपा खातीर हो म्हादयचो मुद्दो ट्रेप म्हणून तांणी कुशीक दवरला. हाचो अर्थ इंडी आघाडी आमची म्हादय कर्नाटक सरकाराक विकपाची आसा, असो आरोप मनोज हांणी ह्या वेळार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
