भांगरभूंय | प्रतिनिधी
भांगरभूंय । प्रतिनिधी
पणजीः राजकी आरक्षणा विशीं भाजपाच्या केंद्र आनी राज्य सरकारान विस्वासघात केल्ल्याचें आदिवासी समाजातल्या लोकांक सांगपाक अनुसूचीत जमातीच्या (एसटी) फुडाऱ्यांनी सुरवात केल्या. फाटल्या तीन दिसांत तांणी सांगे तालुक्यांतल्या कांय गांवानी वचून थंयच्या एसटी समुदायाक भाजपाच्या विश्वासघाताची म्हायती दिली. लोकसभा वेंचणुकेंत भाजपाच्या उमेदवारांक मतां दिनाकात अशें आवाहन तांकां केलां अशी म्हायती एसटी फुडार रुपेश वेळीप हाणे दिली.
लोकसभा वेंचणके पयलीं केद्र सरकारान गोंयांतल्या एसटी आरक्षणा संबंदीची अधिसूचोवणी काडची, अशी मागणी एसटी फुडाऱ्यांनी केल्ली. मात केंद्र सरकारान अधिसूचोवणी काडनास्तना विधेयक पास केलें. ताका लागून आक्रमक जाल्ल्यान एसटी फुडाऱ्यांनी पणजे आझाद मैदानार उपास केल्लो. केंद्रीय मंत्रिमंडळान पास केल्लें विधेयक संसदेत आयल्या उपरांत एसटी आरक्षणाची पुराय प्रक्रिया जावपाक आनीक जायतीं वर्सां लागतली. ताका लागून 2027चे विधानसभा वेंचणुकेंत एसटी समजाक आरक्षम मेळटलें हाचेर आमचो अजिबात विश्वास ना. ताका लागून केंद्रात अधिसूचोवणी काडची अशी मागणी एसटी फुडाऱ्यांनी केल्ली. सरकारा आयकुवपाचे स्थितींत नाशिल्ल्यान एसटी फुडाऱ्यांनी लोकसभा वेंचणुकेंत भाजपाच्या दोनूय उमेदवारांक हारोवपा खातीर काम करपाचो आनी ते खातीर गावांनी वचून लोक जाग्रुताय करपाचो निर्णय घेतिल्लो. ते प्रमाण तांणी ही मोहीम सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
