भांगरभूंय | प्रतिनिधी
पणजी, प्रतिनिधी : लोकसभा वेंचणुके खातीर १८ एप्रिलाचे निमाणे कडेन दोनूय मतदारसंघांतल्यान वट्ट २२ अर्ज दाखल जाल्यात. हांतले दोन अर्ज सोडल्यान उत्तरेंतल्यान ६ आनी दक्षिणेंतल्यान ५ अशा वट्ट ११ उमेदवारांनी अर्ज दाखल केल्यात. उत्तर गोंयचे तुळेंत दक्षीण गोंयचे उमेदवार चड तरणें आसात.
उत्तरेंतल्या ६ उमेदवारांची पिराय ५३ वर्सां अशी आसा. जाल्यार दक्षिणेंतल्या उमेदवारांची सरासरी पिराय ४७ वर्सां आसा. उमेदवारांच्या प्रतिज्ञापत्रांतल्यान ही म्हायती मेळ्ळी.
दोनूय मतदारसंघांतल्या ११ उमेदवारांची पिराय ५० वर्सां परस मात्शी चड आसा. सगळ्या उमेदवारांची पिराय पळयल्यार उत्तर गोंयचे कॉंग्रेसीचे उमेदवार ऍड. रमाकांत खलप हे सगळ्यांत ज्येश्ठ उमेदवार जावन आसात. तांची ७७ वर्सां पिराय आसा. जाल्यार ह्याच मतदासंघांतले अपक्ष उमेदवार विशाल नायक हे आतां मेरेन अर्ज दाखल केल्ल्या उमेदवारां मदीं सगळ्यांत तरणें म्हळ्यार ३३ वर्सां पिरायेचे जावन आसात. उत्तर गोंयांत खलप हांचे उपरांत भाजपच्या श्रीपाद नायक हांचो नंबर लागता. तांची पिराय ७१ वर्सां जावन आसात. जाल्यार उत्तर गोंयचे अपक्ष उमेदवार थॉमस फर्नांडीस हांची पिराय ६१ वर्सां आसात. अखील भारतीय परिवार पार्टी ह्या पक्षाचे उमेदवार सखाराम नायक ४२ वर्सां पिरायेचे आसात. उत्तरेचे तुळेंत दक्षीण गोंय उमेदवाराचे तुळेंत तरणे आसात.
आरजीपीचे रूबर्ट परेरा ३९ वर्सां पिरायेचे आसात. अपक्ष डॉ. कालिदास वायंगणकार ४४, भाजपाची पल्लवी धेंपो ४९, अपक्ष लेक्सी फर्नांडीस ४९, जाल्यार कॉंग्रेसीचे विरियातो फर्नांडीस ५४ वर्सां पिरायेचे जावन आसात.
मजगतीं, अर्ज दाखल केल्ल्या ४ अपक्ष उमेदवारांत दक्षीण गोंयचे उमेदवार डॉ. कालिदास वायंगणकार हांणी गोमॅकोंतल्यान एमबीबीएस पुराय केलां. उत्तरेंतल्या विशाल नायक हांणी बीएएलएलबी जाल्यार थॉमस फर्नांडीस हांणी मुंबय विद्यापीठांतल्यान बीकॉमची पदवी घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
