लोकसभा, विधानसभा आनी गुन्यांवकारी…
भांगरभूंय | प्रतिनिधी
जरी तर ह्या लोकशाय मंदिरांत (लोकसभेंत) शंबरां परस चड कायदे मोडपी खासदार आसात. जाल्यार प्रजेच्या बऱ्याचे कायदे हे चोर, फटींग, नागवणें आनी खुनी प्राणी कशे करतले?
भारत देशाचें लोकशायेचें मंदीर म्हणल्यार लोकसभा, अख्ख्या देशाचे प्रजेन निवडून काडिल्ले प्रजेचे प्रतिनिधीं त्या मंदिरांत वतात. तांकां खासदार म्हणटात. ते परीं भारताच्या दरेक प्रातांत आनीक एक – एक लोकशायेचें मंदीर आसा. आमी ताका विधानसभा म्हणटात. त्या – त्या प्रातांतले प्रजेन वेंचून काडिल्ल्या प्रतिनिधींक त्या मंदिरांत भितर सरपाक संदी मेळटात. ‘टेम्पल ऑफ डॅमोक्रसी’ वा लोकशायेचें मंदीर म्हूण पाचारतना ह्या मंदिरांत बऱ्या सभावांच्याच मनशांक वचूंक संदी मेळची, अशें बऱ्या मनाच्या नागरीकांक दिसता आसतलें. पूण तें तशें घडना हें पळोवन दुख्ख भोगता.
गुन्यांवकारी खासदार
सांगतात त्या प्रमाणें,- आतांचे लोकसभेंत उण्यांत उणे 100 गुन्यांवकारी खासदार आसात खंय. हे खासदार सगळ्या राजकी पक्षांचे आसात. हो नियाळ केल्यार अशें दिसता, ह्या 100 गुन्यांवकारी खासदारांचेरच आमची नदर वता. कित्याक? तांचे गुन्यांव उगते जाल्यात म्हण. आनीक कितले खासदार, जांचे गुन्यांव उगते जावंक ना, ते आमचे लोकसभेंत आसतले? साडे पांचशीं खासदार मदले शंबर, देडशें खासदार गुन्यांवकारी आसात जाल्यार, आमच्या देशाचो फुडार कितें जातलो काय?
गुन्यांवकारी कोण?
गुन्यांवकारी म्हणटा तो कोण? जो मनीस कायदो मोडून कसलीय करणी आधारता तो गुन्यांवकारी जावन आसा. मागीर ती करणी चोरी जावं, नागोवप, लुटप जावं, खून जावं वा बलात्कार जावं. आमची लोकसभा म्हणल्यार नवे – नवे कायदे घडोवन हाडपाची पवित्र सुवात जावन आसा. हे कायदे आमी वेंचून धाडिल्ल्या खासदारांनी करचे पडटात. जरी तर ह्या लोकशाय मंदिरां शंबरां परस चड कायदे मोडपी खासदार आसात. जाल्यार प्रजेच्या बऱ्याचे कायदे हे चोर, फटींग, नागोवणें कशे करतले? उरफाटेंच फुडाराक ह्या गुन्यांवकारांचो आंकडो वाडत वतलो. आनी अखेरेक आमचे लोकशायेचें मंदीर एक ‘गुंडाचें भुंयार’ जायत म्हूण भिरांत आसा. लोकसभेची असली परिस्थिती जाली जाल्यार ती जावपाक कारण कोण आसतलो?
कारणां
- पयले सुवातेर आमी मतदार जबाबदार जावन आसात. कित्याक? आमी आमचीं मतां दितना, मनशांच्या बऱ्या सभावाक मान दिनात पूण तांच्या दुडवांक आनी आमकां केल्ल्या फावराक मान दितात. आमी इतले सुवार्थी जाल्यात कीं आमकां मात्शी कितें बरें केल्यार पुरो, मागीर तो चोर वा खुनी जाल्यार उपकारता, आमी ताका मतां दितात. आनी निवडून हाडटात, म्हणटकच चोरांक आनी खुन्यांक लोकसभेंत वा विधानसभेंत आमीच धाडटा न्हय?
- दुसरे सुवातेर आमच्या देशाचे कायदे जबाबदार जावन आसात. कांय कायदे ‘डिफेक्टीव’ आसात. जाल्यार कांय फावट न्यायसभेंत एक निर्णय जावपाक वर्सांची वर्सां लागतात. आनी तो निर्णय जाय मेरेन एक खुनी वा फटींग, फुडारी आपली राजकी यात्रा चालूच दवरता
- तिसरे सुवातेर जबाबदारीचे बाबतींत आमचे राजकी, पक्ष धोंगीपणां करतात म्हणल्यार फट जावंची ना. राजकी पक्षांनी बऱ्या सभावाच्या आनी प्रमाणीक मनशाकूच वेंचणूक लडपाक तिकेट दिल्ली जाल्यार बरे मनीसूच लोकसभेंत पावतले आशिल्ले. पूण तशें घडना. प्रत्येक राजकी पक्ष कितेंय करून वाकड्या रस्त्यान वचून, सरकार घडोवपाची आनी राजकी पदवी मेळोवपाची येवजण करता. मतां विकतीं घेवंक दुडू जाय. आनी विकतीं मेळना जाल्यार प्रजेक भिवोवन मतां घेवंक गुंडागिरी जाय. राजकी पक्ष वेंचणूक जिखच्या खातीर असल्या मेळ्ळ्या अंतस्कर्णांच्या मनशांक जांचे लागीं दुडू आनी गुंडागिरी आसा, तांकां तिकेटी दितात. आनी लोकसभा वा विधानसभा असल्या मंदिरांनी त्या देंवचारांक हाडून सोडटात.
मत दिवपी प्रजा
आमच्या देशाचो फुडार बरो जातलो जाल्यार आमी वेंचून काडटात, ते प्रतिनिधीं बरे प्रमाणीक आसपाक जाय. आयची प्रजा आपलें स्वताचें बरेंपण पळयता. देशाचें न्हय. गरिबीक लागून आनी शिक्षण सगल्यांक पावूंक नाशिल्ल्या कारणान ही प्रजा वा दुडवांचे नातर गुंडागिरीची बळी जाता. आनी गुन्यांवकारांक मतां दितात. त्या खातीर प्रमाणीक मनशांक निवडून हाडपाची क्रांती हे प्रजेकडल्यान जैतिवंत जायत शी म्हाका दिसना.
कायदे
नवे बरे कायदे करून म्हळ्यार चोर, फटींग, नागवणें, खुनी आनी बलात्कार करप्यांक सारकेच भायर दवरता, तसले कायदे करून ही वायट परिस्थिती सुधारूंक येता. पूण कायदे करपी आतां आसात तेच खासदार अपराधी आसात न्हय? जरी तर हे कायदे तांच्या करण्यांचेर आड वतात. जाल्यार ते खासदार हे कायदे करतले ? केन्नाच ना. म्हणटकच हिवूय वाट सोंपी ना.
राजकी पक्ष
आतां उरतले ते फकत राजकी पक्ष, सगळ्या राजकी पक्षांनी फकत प्रमाणीक मनशांक तिकेट दिवंक निर्णय घेतलो जाल्यार लोकसभा वा विधानसभा बऱ्या मनशांनी भरपाची सुरवात जावंक येता. सगळे राजकी पक्ष देशाचे उदरगती खातीर वावुरल्यात म्हण उतरांनी बोब मारतात.. पूण सुवार्थी गुन्यांवकारांक वेंचणूक लडपाक पक्षाची तिकेट दितात. सगळ्या पक्षां मदीं गुन्यांवकारांक तिकेट ना दिवचो निर्णय जालो जाल्यार, हो निर्णय वेव्हारांत घातलो जाल्यार आनी वेंचणुको जाल्या उपरांत कांय गुन्यांवकारी निवडून आयल्यार तांकां सरकार घडटना सारकेंच भायरायिल्ले जाल्यार ख-खऱ्यांनीच लोकशायेचें नीज रुप येतलें.
रिवोल्ट
दुबाव ना, राजकी पक्षांनी रिवोल्ट जातलो. हे गुन्यांवकारी फुडारी पक्षां आड वेंचणुको झुजतले. तातूंतले थोडे जिखतलेय बी. कित्याक? तांचे लागीं दुडू आनी दादागिरी आसा. आनी त्या शिवाय आशेचे मतदार आसात. राजकी पक्षांक हांका थंय मार बसतलो. घडये सरकार करूंक मेळना जायत, विरोधी पक्ष म्हण बसचें पडत. देशाक वा प्रांताक नितळ सरकार दिवचे खातीर विरोधी पक्ष म्हण वावुरल्यार पर्यांन खूब फायद्याचें जातलें. राजकी पक्षांनी हें कार्य करपाक मनार घेतलें, जाल्यारुच लोकसभेंत वा विधानसभांनी गुन्यांवकारी फुडाऱ्यांचो आंकडो थोडो करपाची आनी गुन्यांवकारांक कुशीक काडपाची सुरवात जातली, हातूंत मात्तूय दुबाव ना.
(लिप्यांत्तर – विशाल सिनाय खांडेपारकार, 8080370)
तोमाझिन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
