भांगरभूंय | प्रतिनिधी
भांगरभूंय । प्रतिनिधी
पोरणे गोंयः चिंबलचे रहिवासी वाठारांत एका बंगलाचें रुपांतर लॉजांत करून थंय रातया उसरां मेरेन संगीत पार्ट्यो करतात अशी कागाळ आयिल्ल्यान चिंबल पंचायत मंडळान सोमाराक ह्या बंगल्याची तपासणी केली. रोहीत कामत हांणे ह्या बंगलो कम लॉजा आड पंचायत मंडळांत कागाळ केल्ली.
संबंदीत सरकारी यंत्रणे कडल्यान कसलेच परवाने घेनास्तना ह्या बंगलाचो वापर लॉज म्हणून करतात आनी थंय व्हडा आवाजांत संगीत वाजोवन पार्ट्यो करतात ही गजाल कामत हांणी पंचायत मंडळाचे नदरेक हाडून दिल्ली. पुलिसांक कळयल्यार तें येवंन संगीत बंद करपाक लायतात मात पार्टी रातयां उसरां मेरेन चालू आसता अशें कामत हांणे सांगलें.
रहिवासी वाठारांत संगीत पार्ट्यो करपाक जायनात . आमी लॉज चलोवपाक परवानो दिलो ना. मात ताचे खातीर पंचायत मंडळांत अर्ज आयला मात आमी ते खातीर परवानो दिवचे नात अशी म्हायती सरपंच स्वप्नेश चोपडेकारान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
