भांगरभूंय | प्रतिनिधी
कामाचे सुवातेर बायलांक लैंगीक त्रास दिवप (प्रतिबंध, आनी निवारण) कायदो, 2013 हो एक नागरी कायदो.
कामाचे सुवातेर लैंगीक छळ जाला म्हणपाच्यो अस्तुऱ्यांच्यो कागाळी उण्यांत उण्या आक्रमक पद्दतीन व्यवस्थापना खाला निवारण करपा खातीर तो कायदो केल्लो. पूण हे विशीं गजाली वेगळेंच वळण घेतात अशें दिसता. हालींच महाराष्ट्रांतल्या नासिक जिल्ह्यांतल्या पुलीस स्टेशनान भारतीय न्याय संहितेच्या (बीएनएस) कलम 49 खाला अंतर्गत समितीच्या वांगड्या आडच एके नामनेच्या कंपनी कडल्यान नोंद केल्ल्या प्रकरणांत लैंगीक छळ करपाक आदार दिल्ल्याचो गुन्यांवकारी खटलो नोंद केला.
कामाचे सुवातेर लैंगीक छळाक प्रोत्साहन दिवप हाची व्याख्या कागाळदाराक आडखळ हाडप, कागाळदाराक दोश दिवप, तिका लैंगीक त्रासाची औपचारीक म्हायती दिवपाक निरुत्साहीत करप, तिच्या कागाळीची जाणविकाय करून घेवप ना, तिच्या तोंडी कागाळी संबंदीत निष्क्रियताय, कागाळीचेर दुर्लक्ष करप, लैंगीक छळ आडावपा खातीर पावलां उबारप ना अशी केल्ली आसा. हाचे उरफाटे एका समीती वांगड्यान आरोपी व्यक्तींकच ढाल दिली आनी ताका लागून लैंगीक छळ चालू दवरपाक प्रोत्साहन दिलें अशें दिसता अशें सांगून सत्र न्यायालयान समिती वांगड्याक जामीन न्हयकारलो. ते भायर जामीन अर्ज सुनावणी वेळार स्पश्ट केल्लें की बरयल्ली कागाळ नाशिल्ल्यान कागाळ समिती कसलीच कारवाय करपाक वा न्याय दिवंक शकना.
कागाळ निवारण समितीच्या वांगड्या आड पयलेच खेपे अशी खर आनी कडक कारवाय सुरू जाता. ही समिती कायद्या खाला निम्न न्यायालयीन दर्जो आशिल्ली मुखेल यंत्रणा आसा. लैंगीक छळाचे कळयल्ले तोंडी कागाळी कडेन गंभीरतायेन पळोवपाक अंतर्गत समितींक आनी लैंगीक त्रासाच्या कळयल्ल्या कागाळींच्या संदर्भांत उप्रासपी परिणामांक तोंड दिवपा खातीर समिती सशक्त करपाक आस्थापना आनी कंपन्यांक ही एक शिटकावणी घांट आसा.
गोंयांतय काय भौशिक आस्थापना अश्यो समित्यो स्थापन करतना कर्तव्यदक्ष, निपक्षपाती, संवेदनशील अशे अंतर्गत वा भायले वांगडी घेनात अशें कांय कडेन दिसून आयलां. अश्या समितीं विशीं बायल कर्मचाऱ्यांक कागाळ करपाक विश्वास दिसना. नासिकच्या प्रकरणाची अशीं आस्थापनां, कंपनी, सरकारी संस्था/ प्राधिकरणां दखल घेवन ह्यो समित्यो गंभीरपणान घडटलीं अशी आस्त बाळगुया.
(श्रेय : डॉ अनघा सरपोतदार, एक सल्लागार, समाजीक शास्त्रज्ञ, संशोधक, धोरण सल्लागार, लेखक, वेवसायीक, कामाच्या सुवातेर लैंगीक छळ कागाळी तपासक हांच्या समाज माध्यम पोश्टाचेर आदारित)
प्रकाश वामन कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
