भांगरभूंय | प्रतिनिधी
मडगांव, प्रतिनिधी : साश्टी म्हालांतल्या कोलवा पुलीस स्टेशनाच्या वाठारांत ब्लॅकमेलींग करून एके 17 वर्सां पिरायेचे चलयेचेर फाटल्या दोन वर्सां सावन लैंगीक अत्त्याचार सुरू आशिल्लो. हे विशीं कागाळ आयल उपरांत कोलवा पुलिसांनी मूळ कर्नाटकांतलो दुबावीत प्रशांत बस्तवडकर हाचे आड गुन्यांव नोंद केला. दुबावीताचो सोद पुलीस घेतात.
मेळिल्ले म्हायती प्रमाण, कर्नाटकांतल्या खानापूर- बेळगांवा रावपी दुबावीत प्रशांत हाचे आड कोलवा पुलिसांनी बाल संरक्षण कायदो कलम 7 आनी धमकावप, जबरदस्ती करप, नेण्टे चलयेचेर अत्याचार करप, ब्लॅकमेलिंग हाचे वांगडा हेर कलमांखाला गुन्यांव नोंद केला. दुबावीत सध्या गायब आशिल्ल्यान पुलीस ताका सोदतात.
जुलय 2021 ते ऑगस्ट 2023 ह्या काळांत दुबावीत प्रशांत हांणी नेण्टे चलयेचेर लैंगीक अत्त्याचार केले. गोंयां सयत कर्नाटकांतल्या विंगड विंगड वाठारांनी परत परत व्हरून दुबावितान तिचेर अत्त्याचार केले. तिचे फोटो काडून ते सोशल मिडियाचेर व्हायरल करपाची धमकी दिली आनी तशेंच तिचे कडल्यान पयशेय मागले. ह्या सगळ्याक उबगून पिडेस्तान आपल्या कुटुंबाक सगळें सांगलें. उपरांक कोलवा पुलिशेंत कागाळ केली. हे पिडेस्त नेण्टे चलयेची वैजकी तपासणी जाली. कोलवा पुलीस उपनिरीक्षक दीपा देयकार हे विशीं फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
