भांगरभूंय | प्रतिनिधी
म्हापशें, प्रतिनिधी ः लिंगभाट-पर्रा श्री नागनाथ महादेव देवळा लागसार पार्क केल्ल्या गाडयांचेर माड कोसळून दोन गाडायांचे सुमार 70 हजारांचें लुकसाण जालें.
शेनवारा दनपारां 12 वरांचे सुमाराक ही घडणूक घडली. घडणुकी वेळार रस्त्या कुशीक कांय गाडयो पार्क केल्ल्यो आशिल्ल्यो. तातूंत टेम्पो ट्रॅव्हल्स क्रमांक जीए 07 टी 6989 आनी मिनीबस क्रमांक जीए 07 टी 1998 ह्या दोन गांडयांचेर माड कोसळ्ळो आनी दोनूय गाडयांचें लुकसाण जालें.
म्हापशें उजो पालोवपी दळाचे जवान सूरज सेटगांवकार, अमित फडते, दीप्तेश गावडे, प्रवीण गांवकार, विश्वनाथ कोरगांवकार, साहू शेळके आनी दत्तराज च्यारी हांणी माड कापून कुशीक केलो.
मजगतीं, उसकय पंचायती लागसार वीज लायनीं सयत रस्त्यार झाड पडलें. हाका लागून कांय वेळ येरादारीची कोंयडी जाल्ली. उजो पालोवपी दळान झाड कापून कुशीक केले. आनी योरादारी सुरळीत केल्ली. वीज कामगारांनी वीज लायन जोडून वीज पुरवण सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
