भांगरभूंय | प्रतिनिधी
आवाज प्रदुशणाचेर नियंत्रण दवरपाक गोंय सरकारचो आराखडो जाहीर
पणजी, बातमीदार ः लग्न, वाडदीस तशेंच लावडस्पीकर वापरून जावपी हेर कार्यावळीं खातीर वर्सुकी 60 हजार रुपया शुल्क भरचें पडटले. राष्ट्रीय हरित न्यायाधिकरणाच्या आदेशा उपरांत गोंय सरकारान आवाज प्रदुशणाचेर नियंत्रण दवरपा खातीर सुदारीत कृती आराखडो जाहीर केला. ह्या आराखड्यांत वर्सुकी शुल्काची तरतूद आसा.
जर तुमी 60 हजार रुपया वर्सुकी शुल्क भरलो जाल्यार तुमकां जाय तितले कार्यावळीं घडोवन हाडपाक मेकळीक मेळटा. तशेंच वैयक्तीक कार्यावळीं खातीर परवानो घेवपाची मेकळीक आसा. वेवसायीक कार्यावळीं खातीर 15 हजार रुपया आनी खाजगी कार्यावळीं खातीर 3 हजार रुपया शुल्क आकारतले. ओपन एअर थिएटरांत जावपी कार्यावळीं खातीर तीन वर्सां मेरेन शुल्क भरुन परवानो घेवपाची मेकळीक आसा. वेवसाय सुलभताय येवजण खाला सरकारान हो निर्णय घेतला.
देवळांनी, चर्चीनी वा खाजगी वाठारांनी सुमार 100 लोकां मेरेनच्या धर्मीक वा घरगुती कार्यावळींक परवान्याची गरज ना. तशेंच सभाघर वा थिएटराच्या धनयांक आवाज मेजपाचीं उपकरणां लावपाची गरज ना. कागाळ जालें उपरांत संबंदीत वेवस्था यंत्रणा उपकरणां घेवन आवाज मेजतली. सकाळीं 6 ते रातीं 10 मेरेन आवाज प्रदुशण मेजपाक जाय. ह्या 75 टक्के काळांत आवाजाचें मापन संबंदीत वेवस्थेन करचें अशें कृती आराखड्यांत म्हणलां.
कांय रस्त्यांचेर वाहन चालक संगीताचे हॉर्न वाजयतात. वाहनांचो आंकडो चड आसता थंय आवाज प्रदुशण जाता. येरादारी खात्यान आवाज प्रदुशण चड आशिल्ल्या रस्त्यांचो अभ्यास करचो. आवाज प्रदुशण उणें करपा खातीर उपाय करचे अशी शिफारस हे वेळार केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
