भांगरभूंय | प्रतिनिधी
नार्व्यां खांब्यार चडटना शॉक लागिल्ल्यान लायनमॅन निसणी वेल्यान पडलो
दिवचल : नार्वें दिवचले विजेच्या खांब्यार वीज दुरुस्ती करपाक चडटना शॉक लागिल्ल्यान निसणी वेल्यान सकयल पडून सुशांत धारगळकार हो 45 वर्सां पिरायेचो लायनमॅन जखमी जालो. तो जखमी जाल्ल्यान ताकतिकेन म्हापशेंच्या उप जिल्हो हॉस्पिटलांत दाखल केला.
लायनमॅन वा हॅल्पर वीज खांब्या वयल्यान सकयल पडून जखमी जावपाची, तशेंच मरपाच्यो घडणुको चालूच आसात. नार्वेंचे घडणुके वेल्यान हो विशय परतून ताजो जाला. एप्रील म्हयन्यांत 19 तारखेक पिळगांवचो तरणाटो मनोज जांबावलीकार हो लायनमॅन व्हाळशें विजेचें काम करतना शॉक लागून मरण अायिल्लें. त्या वेळार मोठो बोवाळ जाल्लो. वीज खात्यान उपरांत परती वीज मारपी इन्वर्टराक लागून हो अपघात जालो अशें सांगून आपली बाजू स्पश्ट केल्ली.
आतां नार्वेंच्या प्रकरणांत शॉक लागून लायनमॅन जखमी जालो. पावसाच्या दिसांनी राज्यांत अश्यो आनीक घडणुको जावंक शकतात. तेन्ना वीज खात्यान ते खातीर कितें आंखणी केल्या? लोकांनी प्रस्न विचारपाक सुरवात केल्या.
हालींच वीज मंत्री सुदिन ढवळीकार हांणी पत्रकार परिशद घेतिल्ली. त्या वेळार मुखेल वीज अभियंत्यान अश्या अपघातांक लायनमॅनांक जापसालदार धरले. वीज खातें लायनमॅनांचे सुरक्षे खातीर सगळी उपकरणां दितात. कितलेंशेच फावटी ते वापरिनात म्हूण अशें अपघात जातात अशें सांगिल्लें.
लायनमॅनांनी, हॅल्परांनी वीज खांब्यार वा ट्रान्स्फॉर्मरार काम करतना जतनाय घेवंक जाय, असो सल्लो लोकांनी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
