लायटीचो आपालिपा चालूच, खात्याचे जायते फोन नंबर अस्तित्वांत नात!

भांगरभूंय | प्रतिनिधी

पणजी, बातमीदार ः हालींसराची ही वाडटी गरमी. मदीं- मदीं ह्या दिसांनी खुबश्या सुवातांचेर पावस झडलो, पूण गरमी कांय कमी जावंक ना. एके वटेन गरमीन लोकांक बरेंच सतायलां जाल्यार दुसरे वटेन खुबश्या वाठारांनी लायटीचो आपालिपा चालूच आसा. मात्सो जरी पावस झडलो तरी लेगीत कांय वाठारांतली रोखडीच लायट वता. मागीर एक वर दोन वर म्हणसर लायट नासता. अशें परिस्थितींत कांय जाण चवकशी खातीर वीज खात्याक फोन करतात. पूण, त्या फोनाक जाप मेळना. कारण वीज खात्यान तांच्या वेबसायटीचेर दिल्ले नंबर कांयच उपेगाचे ना.
आयज सकाळीं सुमार 10.45 वरांचेर सांतिनेज- पणजींतली वीज पुरवण सुमार एक वर बंद आशिल्ली. हे विशीं चवकशी करपा खातीर खात्याच्या संपर्क क्रमांकांचेर फोन केलो तेन्ना सगळे क्रमांक निरुपयोगी आशिल्ल्याचे कळ्ळे. लायट नासली की लोक बेजारतात आनी लायट कित्याक ना, केन्ना येतली, नेमके कितें जाला हे विचारपाक वीज खात्याक फोन करतात. पूण, सध्या वीज खात्याचो एकूय फोन क्रमांक लाग नाशिल्ल्यान लोकांनी तिडक उक्तायला.
सध्या राज्यांत मदीं मदीं पावस लागता. ताका लागून उत्तर गोंयच्या जायत्या वाठारांनी लायटीचो आपालिपा सुरु आसा. आयज सकाळीं पणजीत सांतिनेज वाठारांत सुमार 10.45 वरांचेर लायट गेल्ली. ह्या वेळार आमच्या प्रतिनिधीन वीज खात्याच्या टोल फ्री नंबर 1912 कडेन संपर्क केलो. पूण, तांचे कडल्यान समाधानकारक जाप मेळूंक ना. ‘त्या वाठारांत दुरुस्तीचें काम चालू आसा. पूण लायट कित्याक ना हाचे नेमके कितें कारण आनी लायट केन्ना येतली हें आमी सांगू शकना. आमकां खात्या कडल्यान इतलीच म्हायती मेळटा’ अशें तांणी जाप दिली.
आमच्या प्रतिनिधीन 91- 832- 2490800, 91- 832- 2458304 ह्या नंबराचेर खात्या कडेन संपर्क करपाचो यत्न केलो. तेन्ना दोनूय नंबरांची सेवा बंद आशिल्याचे दिसून आयलें. उपरांत पर्वरी वीज उपकेंद्राच्या 0832- 2417711 ह्या नंबराचेर संपर्क केलो तेन्ना कोणेंच फोन उखल्लो ना. वाळपयच्या 0832- 2374257 क्रमांक डायल केल्लो तेन्ना ‘हो क्रमांक अस्तित्वांत ना’ अशी जाप मेळ्ळी. दिवचल 08322458304 ‘ह्या नंबराचेर सेवा तात्पुरती स्थगीत केल्या’ अशी जाप येता. उपेगाचे नाशिल्ले नंबर वीज खात्यान वेबसायटचेर दिल्ल्या तरी कित्याक? अशें परिस्थितींत आपत्कालीन वेळार फोन करचो तरी खंय? असो प्रस्न नागरिकां मदीं उप्रासता.