भांगरभूंय | प्रतिनिधी
पणजी, बातमीदार : कॉंग्रेस उमेदवार कॅप्टन विरियातो फर्नांडीस दोन तोंडाचे जावन आसा. तांणी गोंयकारांचेर संविधान लादलें, ह्या आपूण केल्ल्या वक्तव्याच्या विशयाचेर चर्चा करपाचो उलो मारला. भाजपाचो सामान्य कार्यकर्तोय तांचे वांगडा ह्या विशयाचेर चर्चा करपाक शकता. मात लायकी नाशिल्ल्या मनशा कडेन आमी चर्चा करचे नात, अशी खर टिका भाजप प्रदेशाध्यक्ष तशेंच खासदार सदानंद शेट तानावडे हांणी केली. पणजे जाल्ले पत्रकार परिशदेंत तानावडे उलयताले. ह्या वेळार आमदार दाजी साळकार आनी संकल्प आमोणकार हाजीर आशिल्ले.
फर्नांडीस हे स्वता नौदळांत आशिल्ले, अशें सांगतात. मात, तांणी आदींय आक्षेप घेवपा सारकीं विधानां केल्यांत. तांणी १५ ऑगस्टाक वास्कोच्या सेंट जसिंतो जुंव्याचेर भारताचो तिरंगो हुबोवपाक आक्षेप घेतिल्लो. एका फादरान शिवाजी महाराजां विशीं अपशब्द वापरले, तेन्नाय फर्नांडीस हांणी तांचें समर्थक केल्लें. फर्नांडीस हे गोंयचो एकवट इबाडपाक सोदतात, असो आरोप तानावडे हांणी केलो.
फर्नांडीस हांणी संविधानाचो तशेंच भारतरत्न डॉ. बाबासायब आंबेडकार हांचो अपमान केला. संविधान लादलां अशें म्हणून तांणी भारताचे पयले प्रधानमंत्री पं. जवाहरलाल नेहरू हांचोय अपमान केला. कॉंग्रेसीचे वरिश्ठ फुडारी राहुल गांधी हांणी हे विशीं जाप दिवप गरजेचें. फर्नांडीस हांचो स्वताचेर विस्वास ना. तशेंच देशाच्या संविधानाचेरूय ना. असले मनीस वेंचणूक लढोवपाक पात्र नात, अशेंय तानावडे हांणी फुडें म्हणलें.
मोदी हांची २७ वेर सभा
प्रधानमंत्री नरेंद्र मोदी हांची २७ एप्रिलाक सांकवाळे व्हडली सभा जातली. हे सभेक ५० हजारां परस चड लोक हाजीर रावतले. ही सभा सांजे वेळार ५ वरांचेर बिर्ला मंदिराच्या मुखा वयल्या जाग्यार जातली, अशी म्हायती खा. सदानंद शेट तानावडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
