भांगरभूंय | प्रतिनिधी
पणजी : आपल्या पदाचो गैरवापर करून लाखांनी रुपयांची अफरातफर केल्ले खातीर आयपीएचबीचे (मानसोपचार आनी मानवी वर्तणूक संस्था) वरीश्ठ सरकारी लिपीक प्रतीक गांवस हाका चार दिसां पयलीं निलंबीत केल्लो. हे विशीं ६ सप्टेंबराक दनपरां २:२० वरांचेर आयपीएचबीचे संचालक डॉ. शिवानंद बांदेकार हांणी आगशी पुलीस स्टेशनांत गुन्यांव नोंद केल्लो. चवकशेंत प्रतीक गांवस हांणी ह्या गुन्यांवांत आपलो हात आशिल्ल्याचें मान्य केलें. मजगतीं काल शेनवारा, ७ सप्टेंबराक दनपरां १ वरांचेर ताका भारतीय न्याय संहितेच्या कलम ३१६ (५) खाला अटक केली.
अप्पर डिव्हिजन क्लार्क ह्या पदाचेर कार्यरत आशिल्लो प्रतीक (३६, सांताक्रुज) ह्या दुबाविताक ४ सप्टेंबराक चवकशे उपरांत निलंबीत केलो. क श्रेणींतल्या एका कर्मचार्यान तांच्या पगारांतल्यान रीण आनी विमा प्रीमियम कपातींतल्यान तफावतीं विशीं चिंता उक्तायल्या उपरांत हीं फटींगपणां उक्ताडार आयिल्लीं. ताका लागून भितरल्यान तपासाची सुरवात जाली. हाचे वरवीं निधी लिपिकाच्या वैयक्तीक खात्यांत वता अशें उक्तें जालें.
विभागाच्या म्हणण्या प्रमाण, लिपिका कडेन कर्मचार्यांचें संबंदीत रीण वा विमा खात्यांत निधी वाटपाची जापसालदारकी आशिल्ली. हाचोच फायदो घेवन, दुबावितान स्टेट बँक ऑफ इंडिया तशेंच कॅनरा बँकेच्या ताच्या वयक्तीक खात्यांत कर्मचारी कर्ज सेवा आनी विमा प्रीमियमा खातीर आशिल्ल्या वट्ट २३,९१,४०२ रुपयांचो निधी वळयलो. मजगतीं, फाटल्या पांच वर्सां सावन हो प्रकार सुरू आशिल्लो. कोणाच्याच मनांत दुबाव निर्माण जावचो न्हय म्हणून दरेका म्हयन्याक वेगवेगळे रकमेची कपात करताले. जेन्ना कर्मचार्यांनी तांच्या कर्जाच्या पेमेंटांतले विसंगती विशीं प्रस्न केलो तेन्ना ह्या लिपिकान तांकां हो मुद्दो वाडोवचो न्हय असो सल्लो दिलो.
लिपिकान पगार आनी वयक्तीक बँक खातींय गुठलायल्यांत. तांणी एकल्यानूच हें जरी केलां कशें दिसता तरी अधिकार्यांक हातूंत हेरांचोय आसपाव आशिल्ल्याचो दुबाव आसा. हेर जायत्यो गजाली फुडल्या तपासांतल्यान स्पश्ट जातल्यो. हे गजालीक लागून माध्यम आनी उणी वेतन श्रेणी आशिल्ल्या कर्मचार्यांक हाचो बरोच व्हड फटको बसला. हे विशीं आगशी पुलीस स्टेशनाचे निरीक्षक अनंत गांवस हांच्या मार्गदर्शना खाला पुलीस उपनिरीक्षक ऋषिकेश रायकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
