भांगरभूंय | प्रतिनिधी
शेंकड्यांनी भावीक पुलीस स्टेशनार दाखल; खर कारवाय करपाची मागणी
दिवचल: शिरगांवच्या श्रीदेवी लयराईच्या धोंडा विशीं तशेंच भाविकां विशीं समाज माध्यमाचेर भावना दुखोवपी पोस्ट तशेंच वक्तव्य केल्ल्या प्रकरणांत देवीचे धोंड आनी भावीक तिडकल्यात. काल (सोमारा) व्हड संख्येन भाविकांनी सांजवेळा दिवचल पुलीस स्टेशनार धांव घेवन कागाळ नोंद केली. श्रेया धारगळकार तशेंच हेर अनवळख्यांक अटक करून खर कारवाय करपाची मागणी कागाळींत केल्या.
काल सांजे शेंकड्यांनी भावीक पुलीस स्टेशनार दाखल जाले. तांचे सयत मयेंचे आमदार प्रेमेंद्र शेट तशेंच दिवचलचे आमदार डॉ. चंद्रकांत शेट्ये तशेंच हेर भावीक दिवचल पुलीस स्टेशनार आयले.
हे विशीं लेखी कागाळ दिवचल पुलीस स्टेशनाचे निरिक्षक राहूल नायक हांचे कडेन दिली. तशेंच हे विशीं संबंदितांचेर खर कारवाय करून तांकां अटक करची अशी मागणी केली. अॅड. दत्तराज न्हावेलकार हांणी ह्या प्रकरणांत सगल्यांनी संघटीत रावन अशे तरेच्या प्रकरणा आड आक्रमक भुमिका घेवप गरजेची आसा आनी ताकतिकेन कारवाय करपाची मागणी केली.
पुलीस निरिक्षकांनी कागाळ नोंद करून घेतल्या आनी गरजेची ती कारवाय करतले अशें आस्वासन भाविकांक दिले उपरांत भावीक शांत जाले. पूण खंयचेय परिस्थितींत संबंदितांक अटक करून खर कारवाय करची अशी मागणी ह्या वेळार भाविकांनी केली.
आमदार प्रेमेंद्र शेट हांणी सदर बायलेन व्हिडियो समाज माध्यमाचेर प्रसारीत करून हजारांनी भाविकांच्यो भावना दुखयल्यात आनी एका प्रकारान समाजीक तणाव करपाचें षडयंत्र पुलिसांनी आडावचें आनी ताकतिकेन कारवाय करून ते बायलेक आनी संबंदितांक अटक करची तशेंच लोकांक तडिपार करपाची शिफारस करतना ते विशींय पुलिसांनी खर भुमिका घेवपाची मागणी तांणी केली.
आमदार डॉ. चंद्रकांत शेट्ये हांणी भाविकांच्यो भावना दुखावप हें पुरायपणान चुकीचें आनी गैर आसून समाजीक सलोखो इबाडपाचो यत्न करप्यांचेर खर कारवाय करपाची गरज आसा अशें तांणी म्हणलें.
ह्या वेळार हाजीर आशिल्ल्या भाविकांनी जो मेरेन संबंदिताक अटक जायना आनी कारवाय जायना तो मेरेन ओगी बसचे नात अशी भुमिका घेतल्या.
मजगतीं, पुलिसांनी दिल्ले म्हायती प्रमाण ते बायलेक हाचे पयलींय एका प्रकरणांत अटक केल्या आनी चार दिसांची पुलीस कोठी दिल्या. हे विशीं दिवचल पुलिशेंत नोंद केल्ल्या कागाळी प्रमाण आमी फुडली कारवाय निश्चीत करूंक अशें तरेचें आस्वासन पुलीस निरिक्षक राहूल नायक हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
