भांगरभूंय | प्रतिनिधी
गोंयकारांच्या बर्या खातीर केली प्रार्थना
पणजी : कॉंग्रेस फुडार्यांनी शिरगांवचे लयराई आनी मिलाग्रीस सायबीणच्या थळाक भेट दिवन गोंयचे जनतेच्या बर्या खातीर प्रार्थना केली.
विरोधी पक्ष फुडारी युरी आलेमाव, केंपेचे आमदार एल्टन डिकॉस्ट हांचे वांगडा कॉंग्रेसीच्या वरीश्ठ फुडार्यांक वांगडा घेवन शिरगांवच्या श्री देवी लयराई देवूळ आनी म्हापशेंची चर्च ऑफ अवर लेडी ऑफ मिरॅकल्स (मिलाग्रेस सायबीण) हांगा भेट दिली. ह्या वेळार कॉंग्रेसीचे उपाध्यक्ष सुनील कंवठणकार, सरचिटणीस मोरेनो रेबेलो, जिल्लोध्यक्ष अॅड. शशांक नार्वेकार, मंगळदास नायक, युवा अध्यक्ष अॅड. अर्चित नायक, बायलां अध्यक्ष प्रतीक्षा खलप आनी कॉंग्रेस नेते अॅड समील वळवयकार, अॅड. अमित पालेकार हांचो आसपाव आशिल्लो. तांचे वांगडा जिल्लो परिशद वांगडी संजय वेळीप, मालिफा कार्दोझ, सुमित्रा पागी, आदले जिल्लो परिशद वांगडी एडविन (सिप्रू) कार्दोझ, दकईण गोंय जिल्लो परिशदेची आदली अध्यक्ष संजना वेळीप आनी आदली सरपंच पौसफिलिप दोरादो हाजीर आशिल्ले.
दोनूय सुवातांचेर फुडार्यांनी गोंयच्या लोकांची शांतता, समृद्धी आनी सर्वांगीण कल्याणा खातीर आशीर्वादाची मागणी करीत प्रार्थना केली. ही भेट, विविधतेंतल्या एकवटाचो, गोंयचे समृद्ध परंपरेचो आदर आनी स्विकार करीत, राज्याच्या सांस्कृतीक आनी जातीय एकचारा प्रती तशेंच आध्यात्मीक मुल्यांप्रती कॉंग्रेस पक्षाची वचनबद्धताय दाखयता अशें युरी आलेमाव हांणी म्हणलें.
दरेका गोंयच्या नागरिकांच्या बर्या खातीर काम करतना सामुहीक प्रार्थना आनी एकात्मतेचेर आमी भर दिल्या. गोंयची तांक तांच्या जातीय एकचारांत आनी समाजीक, सांस्कृतीक दायजांत आसा. हाची राखण करप आनी सांबाळ करप गरजेचें. ह्या वेळार कॉंग्रेस फुडार्यांनी भावीक आनी थळाव्यां कडेन संवाद सादलो, तांकां परबीं भेटयलीं आनी गोंयची निश्ठेन सेवा करपाचे आपले बांदिलकायेचो पुनरुच्चार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
