भांगरभूंय | प्रतिनिधी
बिजनोर, खबरां संस्था: लग्न म्हळ्यार दोन कुटुंबांचे सुखाचे खीण. लग्नाची गजाल येता तेन्ना लग्नाच्या घरांतलें वातावरण उमेदीचें आसता. लग्न, खरेदी, संस्कार जुळोवन फुडाराची सपनां पळोवप जाता. पूण केन्ना केन्ना लग्न सारको सुखी खीण कांय दुर्दैवी घडणुकांक लागून इबाडटा. अशीच एक धक्को दिवपी घडणूक उत्तर प्रदेशांतल्या बिजनोर जिल्ह्यांतल्या एका गांवांत घडल्या. नीतू नांवाचो २२ वर्सां पिरायेचो तरणाटो आपलें लग्न आसा म्हणून बरोच उमेदी आसलो. ताचें लग्न चालू आसतना अचकीत तो जमनीर कोसळ्ळो आनी लग्नाच्या दिसाच ताका मरण आयलें.
लग्न सुरू आसतना अचकीत जमनीर कोसळिल्ल्यान सोयर्यांनी बोवाळ केलो. कांय जाणांनी ताका उखलून रोखडोच हॉस्पिटलांत व्हेलो. मात ते ताचो जीव वाटावपाक शकले नात. नितूच्या कुटुंबियांनी सांगितलें, ताची भलायकी सामकी घटमूट आशिल्ली. ताका हाचे पयलीं कसलेंच तरेचें दुयेंस नाशिल्लें.
२६ एप्रिलाक नितूचें लग्न आशिल्लें. ताचे पयलीं परंपरे प्रमाण विधी सुरू आशिल्ले. लग्नाची मिरवणूक जाले उपरांत नितून देवळांत वचून दर्शन घेतलें. थंय तो अचकीत कोसळ्ळो. ताका थंय सिपीआरूय दिलें. मात नितून ताका प्रतिसाद दिवंक ना. उपरांत ताका जसपूर हांगच्या हॉस्पिटलांत व्हेलो. थंय पावताच दोतोरांनी ताका मरण आयिल्ल्याचें सांगलें.
नितूच्या गांवां लागसारचो गांव चहरवाला हांगचे चलये कडेन ताचें लग्न जावपाचें आसलें. नितूक मरण आयिल्ल्याचें आयकून ह्या दोनूय गांवांनी दुख्ख पातळ्ळां. बिजनोरचे पुलीस अधिक्षक नीरज कुमार जदौन हांणी, नितूच्या कुटुंबियांनी आजूनय कसलीच कागाळ दाखल करूंक ना. मात आमी मरण आयिल्ल्याच्या कारणाचो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
