भांगरभूंय | प्रतिनिधी
म्हापशें: करासवाडो, म्हापश्यां 2014 वर्सा घडिल्ल्या दीपाली दिपेश शेटकार (31) ह्या लग्न जाल्ले बायलेची आत्महत्या प्रकरणांत सासुमांय, मांव आनी नणंद हांचे आड म्हापशें पुलिशेंत हुंडा बळीचो गुन्यांव नोंद केला.
मयत दिपालीच्या बापायचे याचिके प्रमाण उच्च न्यायालयान गुन्यांव नोंद करपाचो आदेश दिल्लो. ते प्रमाण उपजिल्होधिकारी कबीर शिरगांवकार हांणी पुलिशेंत कागाळ नोंद केली तेन्ना पुलिसांनी मयतीचो मांव जगनाथ शेटकार, सासुमांय अनुराधा शेटकार आनी नणंद समिक्षा शेटकार हांचे आड भारतीय दंड संहितेच्या कलम 304 (ब) आनी 34 खाला हो गुन्यांव नोंद केला.
ही आत्महत्येची घडणूक 12 मे 2014 दिसा घडिल्ली. पिडितेन आपल्या घोवा घरा गोळ घेवन आत्महत्या केल्ली. मयत दिपालीन लग्नाच्या स म्हयन्यांनी हें पावल उबारिल्लें.
हो हुंडाबळीचो प्रकार आशिल्ल्याचो दुबाव उक्तावन मयतीच्या बापायन पुलिशेंत कागाळ नोंद केल्ली. पूण पुलिसांनी गुन्यांव नोंद करूंक नाशिल्ल्यान तांणी म्हापशें न्यायालयांत धांव घेतिल्ली. पूण न्यायालयान तांची याचिका भायरायले उपरांत तांणी मुंबय उच्च न्यायालयांत दाद मागिल्ली.
मजगतीं, ह्या प्रकरणांतलो दुबावीत जगनाथ शेटकार हांकां मरण आयलां. जाल्यार अनुराधा ही दुयेंत आशिल्ल्यान हांतरुणार आसा. जाल्यार समिक्षा हिचें लग्न जालां. मजगतीं, मयती सयत तिचो घरकार दिपेश हो लेगीत मुखबधीर आसा. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
