भांगरभूंय | प्रतिनिधी
पणजी: दक्षीण गोंयांतले सान पिरायेचे चलयेक लग्नाचें हांयस दाखोवन तिचेर लिंगीक अत्यचार करून तिका गर्भपात करपाक भाग पाडिल्ल्याचो प्रकार घडिल्लो. ह्या प्रकरणांत फोंडेंच्या 27 वर्सा पिरायेच्या तरणाट्या आड बायलां पुलिसांनी जलदगती तशेंच पॉक्सो न्यायालयांत 130 पानांचें आरोपपत्र दाखल केलां. हातूंत 14 साक्षिदारांची साक्ष नोंद केल्या. ह्या प्रकरणाची फुडली सुनावणी 10 जून दिसा जातली.
पिडीत चलयेन ह्या प्रकरणांत पणजेंतल्या बायलां पुलीस स्टेशनार कागाळ दाखल केल्ली. ते प्रमाण दुबावीत तरणाट्यान तिचेर सप्टेंबर 2022 वर्सा लिंगीक अत्यचार केल्लो. तें गुरवार जाले उपरांत ताणें ताका गर्भपात करपाक भाग पाडलें. उपरांतूय दुबावितान तिचेर खूबशे फावटी अत्यचार केलो. हाची दखल घेवन पुलीस निरिक्षक रिमा नायक हांच्या मार्गदर्शना खाला उपनिरिक्षक रुपाली गोवेकार हांणी दुबाविता आड भादंंसंच्या कलम 376, 420, 313 गोंय बाल कायद्याचें कलम 8 (2) आनी बाल लिंगीक शोशण विरोधी कायदो 2012 (पॉक्सो) च्या 4 आनी 8 कलमा खाला गुन्यांव दाखल केला. उपरांत पुलिसांनी 27 मार्च 2024 दिसा दुबाविताक ताच्या कामा वेल्यान अटक केल्ली.
उपरांत ताका पॉक्सो न्यायालयांत हजर करतकूच न्यायालयान ताका पयलीं सात दिसांची पुलीस कोठी दिली. ती सोंपले उपरांत ताका न्यायालयीन कोठी दिली. ह्याच वेळार दुबावितान न्यायालयांत दाखल केल्लो जामीन अर्ज भायरायलो.
मजगतीं, बायलां पुलिसांनी तपास पुराय करून पॉक्सो न्यायालयांत दुबाविता आड 14 साक्षिदारांचे साक्षीन 130 पानांचें आरोपपत्र दाखल केलें. हे विशींची फुडली सुनावणी 10 जून दिसा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
