लखनौ सुपर जायण्ट्साचें आकर्शक जैत

भांगरभूंय | प्रतिनिधी

ऋतुराज गायकवाडाच्या शेंकड्याक लखनौ सुपर जायण्ट्साच्या मार्कस स्टोयनीसान शेंकड्यान जाप दिली. चेन्नय सुपरकिंग्साच्या 210 धांवड्यांचो फाटलाव करतना लखनौ सुपर जायण्ट्साचे सुरवातीचे बॅट्समन अपेशी थारले. पूण, स्टॉयनीसान देवदत्त पडिक्कल आनी निकोलस पुरन हांच्या वांगडा अर्द शेंकड्यांच्यो भागिदाऱ्यो करून लखनौची जैताची आस्त कायम राखली. स्टॉयनीसान आयपीएलांतलो पयलो शेंकडो नोंदयलो. ताच्याच शेंकड्या नेटार लखनौन उमळशीक वाडोवपी जैताची नोंद केली. लखनौन 6 विकेटींनी जैत जोडून गुणतकट्यांत चवथे सुवातेर उडी घेतली. लखनौन 19.3 ओव्हरींनी 4 विकेटी व्हगडावन 213 धांवड्यो करून जैत जोडलें.

दीपक चहराचे पयलेच ओव्हरींत क्विंटन डी कॉक (0) बोल्ड जालो. पूण, मुखेली लोकेश राहुल आनी स्टॉयनीस हाणें डाव सांबाळपाचो यत्न केलो. पण, मुस्तफिजूर रहमानान पांचवे ओव्हरींत राहुलाक (16) बाद करून लखनौक व्हड धपको दिलो. स्टॉयनीसान 26 बॉलांनी अर्द शेंकडो पुर्ण केलो आनी पंगडाक 10 ओव्हरींनी 2 बाद 83 धांवड्यां मेरेन पावयलो. 11वे ओव्हरींत गायकवाडान मथिशा पथिराणाक बॉलींग करपाक हाडलो आनी ताणें अखेरच्या बॉलाचेर देवदत्ताक (13) बोल्ड केलो.

लखनौन 12.2 ओव्हरींनी 100 धांवड्यो केल्यो. स्टॉयनीसाक निकोलस पुरनाची बरी साथ मेळ्ळी. लखनौक निमाण्या 36 बॉलांनी 87 धांवड्यांची गरज आशिल्ली. दोगांयनी 26 बॉलांनी अर्द शेंकड्याची भागिदारी केली. शार्दुल ठाकूरान घाल्ले 16वे ओव्हरींत पुरनान दोन सके आनी एक चवक्याचे मजतीन वट्ट 19 धांवड्यो केल्यो. 24 बॉलांनी 54 धांवड्यांची गरज आशिल्ली. त्या वेळार स्टॉयनीस आनी पुरन ही जोडी पथिराणान फोडली. दोगांयनी 34 बॉलांनी 70 धांवड्यांची भागिदारी केली. पुरनान 15 बॉलांनी तीन चवके आनी दोन सक्यांचे मजतीन 24 धांवड्यो करून बाद जालो.

स्टॉयनीसान 56 बॉलांनी 9 चवके आनी पांच सक्यांचे मजतीन शेंकडो पुर्ण केलो. निमाण्या 12 बॉलांनी 32 धांवड्यो केल्यो. पथिराणाचे ओव्हरींत 13 धांवड्यो आयल्यो. निमाण्या स बॉलांनी 17 धांवड्यांची गरज आशिल्ली. स्टॉयनीसान पयल्या दोन बॉलांचेर 10 धांवड्यो केल्यो. तिसरो बॉल नो बॉल थारलो. स्टॉयनीसान ताचेर लेगीत चवको मारलो. फ्री हिटाचेर चवको मारून स्टॉयनीसान मॅच सोंपयली. ताणें 63 बॉलांनी 13 चवके आनी स सक्यांचे मजतीन नाबाद 124 धांवड्यो केल्यो.

ते पयलीं मुखेली ऋतुराज गायकवाडान (नाबाद 108) झणझणीत शेंकडो नोंदयलो. चेन्नय सुपरकिंग्सा वतीन शेंकडो मारपी तो पयलो मुखेली थारलो. ताका शिवम दुबेची बरी साथ मेळ्ळी. दोगांयनी मेळून लखनौ सुपर जायण्ट्साची बॉलींग फोडून काडली.

अजिंक्य रहाणे (1) आनी डॅरिल मिचेल (10) ह्या दोगूय बाद जाले त्या वेळार चेन्नय सुपरकिंग्साचो स्कोर 49 आशिल्लो. लोकेश राहुल आनी दीपक हुड्डा हांणी उत्कृश्ट कॅची धरल्यो. पूण, तांचे हे मेहनतीचेर चेन्नयचो मुखेली ऋतुराज गायकवाडान उदक रकयलें. रवींद्र जडेजा 19 बॉलांनी 17 धांवड्यो करून कॅच बाद जालो. ऋतुराज फॉर्मांत दिसलो. ताका आडावप लखनौच्या सगल्या बॉलरांक कठीण जाल्लें. चेन्नय सुपरकिंग्सा वतीन ओपनर म्हणून दोन हजार धांवड्यो पुर्ण करपी गायकवाड पयलो बॅट्समन थारलो. शिवम दुबेन 16वे ओव्हरींत सेगीत तीन सके मारून गायकवाडा वांगडा मेळून 24 बॉलांनी अर्द शेंकड्यांची भागिदारी केली. गायकवाडान फुडले ओव्हरीची सुरवात सक्यान केली.

गायकवाडान 56 बॉलांनी शेंकडो पुर्ण केलो. हातूंत 11 चवक्यांचो आनी तीन सक्यांचो आस्पाव आशिल्लो. सुरेश रैना, शेन वॉटसन आनी मुरली विजय हांच्या उपरांत चेन्नय वतीन दोन शेंकडे मारपी गायकवाड चवथो बॅट्समन थारलो. गायकवाडाचो हो वट्ट 6वो टी-20 शेंकडो थारलो. ताणें लोकेश राहुलाच्या विक्रमा कडेन बरोबरी केली. सुर्यकुमार यादव आनी शुभमन गील (5) हांकां फाटीं घाले.

दुसरे वटेन शिवमान 22 बॉलांनी अर्द शेंकडो पुर्ण केलो. तो धांवबाद जालो. धांवबाद जावचे पयलीं ताणें 27 बॉलांनी तीन चवके आनी सात सक्यांचे मजतीन 66 धांवड्यो केल्यो. अखेरचे दोन बॉल बाकी आसतना महेंद्रसिंग धोनी मैदानांत देंवलो. गायकवाडान 60 बॉलांनी 12 चवके आनी तीन सक्यांचे मजतीन नाबाद 108 धांवड्यो केल्यो. धोनीन एका बॉलान चार धांवड्यो करून चेन्नयक 4 बाद 210 मेरेन पावयलो.